खेळ- तियात्राचें जैत

भांगरभूंय | प्रतिनिधी

खेळ– तियात्र जमनीवेल्या फेळांतल्यान उपजल्लो म्हणटकच मूळ फेळ प्रकाराक धरून खेळ– तियात्र दिग्दर्शप्यांच्याच नांवांचेर चलूंक लागलो, म्हळ्यारुच तियात्रा परीं कलाकाराचीं नांवां हातपत्रार दाखोवंक पड नासलीं.

आदल्यान चालू
खेळ- तियात्राचो बापूय सर्गेस्त रुजारियो रोड्रिगीस खेळ- तियात्राच्या मळार येतकच खेळ– तियात्र ब-याच जोरान चलोवंक लागले. ताणें खेळ– तियात्राच्या मळार जायतीं नवलां घडोवन हाडिल्लीं, जे वरवीं खेळ– तियात्र प्रकार फांकी जायत गेलो आनी तियात्राक ताच्या उंचेल्या सिंहासणावेलो हालोवपाक यशस्वी जालो. तियात्र मळर फूट आनी खेळ– तियात्रा मळार पोटतिडकीन जातल्या विकासा वरवीं तियात्र आनी खेळ– तियात्रा मदीं चलिल्ल्या धांवणेंत खेळ– तियात्र फुडें गेलो. जायते निजाचे तियात्र पळेणार येदनां म्हळ्यार तियात्र सोडून खेळ– तियात्राचे पाटलावदार जाले. खेळ– तियात्र जो बार्देसांत बिल्कुल चलनासलो, थंय तो येदनां म्हळ्यार थंयचे वसरे आनी माटोव सजोवंक लागलो आनी प्रयोगां फाटल्यान प्रयोग करून लोकप्रिय जायत गेलो, जसो आदीं तियात्र जातालो.
खेळ– तियात्र जमनिवेल्या फेळांतल्यान उपजल्लो म्हणटकच मूळ फेळ प्रकाराक धरून खेळ– तियात्र दिग्दर्शप्यांच्याच नांवांचेर चलूंक लागलो, म्हळ्यारुच तियात्रा परीं कलाकाराचीं नांवां हातपत्रार दाखोवंक पड नासलीं. रुजारियो रोड्रिगीस आनी सांगाती म्हळ्यारूच पुरो आसलें. जशे आदीं फेळाचे पंगड फेळ शिकोवपी मेस्त्रींच्या नांवांचेर चलताले, देखीक – हाडा मिंगेल, शेंप्या मिंगेल, पिल्यां पात्रीस, आंतोन मारि, निक्लाव मारियान, दोन तकलो, आदी म्हणचे अख्खा पंगडाचो माज आनी वळख म्हळ्यारुच फकत दिग्दर्शकाचें नांव आसलें.
खेळ– तियात्र प्रकार पालकार रुजोवंक रुजारियो रोड्रिगीसान नव्यो प्रथा (इनोवेशन) पालकार दाखयल्यो आनी म्हत्वाचीं पावलां मारलीं तीं म्हळ्यार सुरवातेक खेळ– तियात्राच्यो दोन-दोन पार्ट्यो (इंटरवाला पयलीं एक आनी उपरांत दुसरी) जाताल्यो त्यो काडून ताणें ‘नॉन स्टॉप’ एकूच पार्ट केली आनी फुडें ह्या खेळ– तियात्र प्रकाराक ‘नॉन स्टॉप ड्रामा’ म्हण नांव दिलें. ताचे पयलीं खेळ– तियात्रांतले कांत (canto) फेलां परीं फकत तीन वो चार नादांचेरुच (सूर) बसोवन परतून–परतून तेच सूर आयकुपाक मेळटाले त्या जाग्यार साबार नादांचेर कांत बसोवपाची पद्दत भितर काडली, जे वरवीं कांत आकर्शींत जावंक लागले. मन भुलगायते देखावे (सीन्स) बिजलियेचो अर्थभरीत वापर आनी नवलां, जशी घुंवती माची, आकर्शींत ‘स्टेज-क्राफ्ट’ अजापीत ‘ट्रीक सीन्स’ आदी पालकार सादर केल्यो आनी प्रेक्षकांक दिपकावन उडयले. आनीक एक ताचें मोठें आनी धाडशी पावल म्हळ्यार नव्या-नव्या आपल्या गांवच्या आनी लागशिल्ल्या गांवच्या तरणाट्यांक वेवसायीक मळार कलाकार म्हण पयलेच फावट ताणें हाडले. तशें पळोवंक गेल्यार ताच्या सुरवातेच्या पंगडांत अर्द्या वयर ताचेच मावशे–भाव, भयणी आसलीं. हे तरेन रुजारियो रोड्रिगीसान रुजयिल्लो खेळ– तियात्र वो नॉन स्टॉप ड्रामा प्रकार ताचे शिवाय रोजफर्न्स, मेनीनो दे बांदार, प्रिन्स जाकॉब, पास्कॉल रोड्रिगीस, आदी हांणी फुलयलो, फळयलो आनी फुडें व्हेलो.
खेळ– तियात्र गोंयांत बरोच फुल्लो आनी तो प्रेक्षकांचे आवडिचो जाल्ल्यान आनी तेच बराबर खेळ– तियात्राचें ‘बजेट’ वो खर्च कमी आशिल्ल्यान इगर्जेच्या फेस्तांक, जंय आदीं तियात्र दाखयताले थंय आतां खेळ-तियात्र पसंद करूंक लागले. तियात्राचे कोत्रादरुय आतां तियात्रांचेर दुर्लश करून खेळ– तियात्रांचे कोत्राद घेवंक लागले. मुंबयंत जंय आदीं खेळ-तियात्रांक प्रेक्षकांची मागणी नासली म्हण ते मुंबयंत व्हरपाची कोणूच कोत्रादोर धाडस करीनासले थंय आतां खेळ– तियात्रांचेर पैज लावंक कोत्रादारांचें भिरें स्पर्धेक पडूंक लागलें. हे तरेन तियात्र फाटीं पडून खेळ-तियात्र वा ‘नॉन स्टॉप ड्रामा’ फुडें टांच मारीत रावलो.

(मुखाल चलता)
लिप्यांतर : विशाल खांडेपारकार, 8080622370

फाऊस्तो वि. दा. काॅस्ता
9821228684