भांगरभूंय | प्रतिनिधी
तियात्राची दशा – 12
फाऊस्तो वि दा कॉस्ता
जसो खेळ –तियात्र वा ‘नॉन स्टॉप ड्रामा’प्रकार फुडें टांच मारीत गेलो तशे तातूंत जायते बदल जायत गेले. बऱ्याचे तशेच वायटाचेय. जायत्यो सुधारणा भितर सरल्यो. जायते नवे दिग्दर्शक ह्या मळार प्रवेश करूंक लागले आनी वेतेक पांच म्हणिल्ले वरीं नवीं नवीं कलाकारां. बरी गजाल म्हणल्यार मुखेल भुमिकेंत नट-नटयेच्या पात्रांत तरणीं-तरणीं आनी आकर्शीत मुखामळां माचयेर दिसूंक लागलीं. प्रोम्टींगांचेर पातयेनासतना, सामकें पाट करून आनी मदीं कसलोच खंड पडूंक दिनाशिल्यान सुडसुडीत हिंदी सिनेमा सारके ‘नॉन स्टॉप ड्रामा’चे प्रयोग प्रेक्षकांक पळोवंक मेळ्ळे, जातूंत अभिनय करपूय सिनेमा सारकेंच जातालें, विशेश करून मुखेल अभिनयांत आनी खलनायकाच्या सवंगांत. मुखेल अभिनयांत रोमान्स करतना नाच आसलो जाल्यार तो सिनेमा परीं खूब आकर्शीत जाल्लो पळोवंक मेळटालो. संहितांनी (स्किप्ट) बरे-बरे संवाद आनी ओपारी प्रेक्षकांक आयकूंक मेळ्ळ्यो. बिजलेचो उत्तम वापर आनी ‘बॅकग्रावंड’ संगिताचो तसोच विशेस पात्रां आनी सवंगां खातीर तें-तें पात्र माचयेर प्रवेस करतना तें-तें संगीत वा ‘सिग्नेचर ट्यून’ वाजोवप, अश्यो जायत्यो सुधारण्यो खेळ-तियात्रांनी भितर सरल्यो. खेळ-तियात्र माचयेर राज चलयतलो काळ तो.
जंय पयलीं एकूच विनोदी कलाकार आसतालो आनी कॉमेडी मुखेल काणयेक जोडून आसताली, तातूंत बदल करून दोन-दोन विनोदी कलाकार रस्त्यार येवन मुखेल काणयेक लागू जायनासलोली कॉमेडी भरशिवपाची पद्दत येदनांच खेळ-तियात्रांतल्यान वा ‘नॉनस्टॉप ड्रामां’नी सुरू जाली. ताचे पयलीं जशें खेळांनी मेस्त आसतालो, तसोच खेळ-तियात्रांनी मुखेल काणयेक जोडून एकूच कॉमेडियन आसतालो. पॅट्रीक दरांदोचो भातागोठो आनी रुजारियो रोड्रिगीसाच्या शोवांनी खासा रुजारियो, उपरांत आलाशिऱ्याक विथालाक सांगाताक घेवन, पूण कॉमेडी मात मुखेल काणयेक धरुनूच. म्हज्या उगडासांत असले दोन विनोदी कलाकार घालून रस्त्यार कॉमेडी घातलेलो प्रयोग हांवें पयलेच खेपेक अणभवलो तो लिंगोरियो फेर्नाडिसाच्या ‘जुदास’ ह्या खेळ तियात्रांत, 1977 वर्सा. हे दोन विनोदी कलाकार जावन आसले फ्रॅक फेर्नांडिस आनी एक्स आल्मैदा. ताचे उपरांत मागीर आगळें- उणें सगल्याच खेळ- तियात्रांनी दोन विनोदी कलाकार घालून रस्त्यार मुखेल काणये भायली कॉमेडी घालपाची ही पद्दत आपणायली.
लिगोरियो फेर्नांडिसा उपरांत ए.एम. पाचेकोच्या फातोर खेळ-तियात्रांत अशी फामाद जाल्ली कॉमेडी जोडी म्हळ्यार फिलीप आनी पीटर डि कॉस्ता, रोजफर्साच्या ‘थापट’ खेळ-तियात्रांत जाकोब (आतां प्रिन्स जाकोब) आनी रुजारियो पेरेरा (रिंगो रेडियो). रुजारियो थोड्याच काळा मदीं परदेसांत गेल्ल्यान ताच्या जाग्यार आयलो बेकार (अँथनी). बेकारुय कांय म्हयन्यां मदीं बोटीर गेल्ल्यान जाकोबाक सांगात दिवंक आयलो फिलीप. जाकोब-फिलीप ही कॉमेडी जोडी थोड्या काळाक चल्ली. 1982 वर्सांत मिनीनो दे बांदार हाच्या ‘दुडू आनी गिन्यान’ ह्या लौकीक खेळ-तियात्रांत असली कॉमेडी करपी पयलेच खेपेक फिलीप आनी रोजी (सांगें) हांचें जोडें पालकार आयलें. अशे तरेन खेळ-तियात्रांनी रस्त्यार भायली कॉमेडी घट रीग घेयत रावली आनी अदीक कॉमेडी सादर करच्या हेतून दोन विनोदी कलाकार आसले थंय तीन जाले, तीन आसले थंय चार आनी जशे परीं प्रेक्षकां कडल्यान कॉमेडीक अदीक आनी अदीक मागणी (डिमांड) वाडत रावली तशें पालकार विनोदी कलाकारांचो आंकडो वाडत गेलो आनी आयज तियात्रांनी आठ लेगीत विनोदी कलाकार आस्पावन घेवप जालें आनी हे सर्तींतल्यान प्रेक्षकांक उणाक आनी बे-मर्यादीक कॉमेडीचो दिर्वितीमेन्ट सादर करपाचो हो परिणाम खेळ तियात्रांतल्यान उपजलो म्हणपांत कांयच हरकत ना.
खेळ-तियात्रांतल्यान असली रस्त्यार भायलीं कॉमेडी करपाची पद्दत उपजली, फांकली आनी आयज तियात्रांनी ती तकली वयर काडून रावली! कशी?… तें मुखार फुडल्या लेखांत पळोवया.
(मुखार चलता)…
लिप्यांतर: विशाल खांडेपारकार, 8080622370
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
