भांगरभूंय | प्रतिनिधी
हालींच्या दिसांनी खेळांच्यो जायत्यो खबरो आयकूंक, वाचूंक मेळटा. क्रिकेट, फुटबॉल हांच्यो सर्ती म्हणात, निवड म्हणात ह्यो खबरो आसतातूच. पूण, काल -पयर तुमीं वाचलां आसतलें की बायलांचे क्रिकेट आयपीएला मदीं कंपन्यांनी कोट्यांनी रुपयांची उलाढाल करून आतां बायलांकूय करियर करतना अर्थीक लाव कसो जावं येता, हें दाखोवन दिला. आयचे घटकेक गोंयान जायते खेळ जातात, पूण जो मेरेन तुमी राष्ट्रीय पांवड्याचेर पावनात, तो मेरेन कांय खरें नासता. हाका एक उपाय म्हळ्यार बरें मार्गदर्शन घेवन जायत्या सर्तींनी वांटेकार जावपाचें. खेळपांत आतां करियर करपाक खूब संद आसा, हें जरी खरें आसलें तरी तो वा ती खेळगडी आपलो पराक्रम राष्ट्रीय पांवड्याचेर दाखयना तो मेरेन ताच्या/ तिच्या यत्नांक तशें म्हत्व उणेंच. आयज आमचो फुटबॉल खेळ हो राज्याचो दर्जो आशिल्लो खेळ जावन आसा. तातूंत चल्या वांगडा चलयो लेगीत वांटेकार जातात.
क्रिकेट जावं फुटबॉल खेळाचें म्हत्व जगभर पातळ्ळां. हाका टीव्ही प्रक्षेपण जशें जापसालदार आसा तशें अर्थीक उत्पन्नाचो भागूय कारणीभूत आसा. आमी तरणाटे जर शिकले उपरांत नोकरेचेर दोळो दवरपाक लागले तर ते अडचणीचें जावं शकता. कित्याक तर दिसान दीस सर्त वाडत आसा, पूण खेळा भीतर चडश्या खेळा प्रकारा कडेन आमी आडनदर केल्या. हालींच खेलो इंडिया सर्त जाली तातूंत गोयच्या पंगडांक फक्त एकूच कांश्यां पदक मेळ्ळें, पूण शेजारच्या महाराष्ट्रान मात सगळ्यांत चड पदकां मेळोवन पयलें स्थान मेळयलें. ही देख आमी घेवपाक जाय. पेंवप, बाॅक्सिंग, तिरंदाजी सारक्या प्रकारां कडेन आमी वचपाक जाय, हांगां गोंयान तशी सर्त उणी दिसता. तुमकां एकदां हातूंत प्रभुत्व मेळ्ळें काय तुमी राज्या भायल्या सर्तींनी वांटेकर जावं येता. जितले ल्हान पिरायेचेर तुमी खेळ वेंचून खेळूंक वा ताचो सराव करूंक लागशात तितलें बरें.
खडेगांठ खेळगडी तयार जावपाक मार्गदर्शक लेगीत म्हत्वाचो. ह्या खातीर गोय सरकारान मार्गदर्शनाचें काम करपी खेळाडूंक शिकपा खातीर एक येवजणय तयार केल्या. हें फुडलें शिकप तुमी पटियालाच्या नेताजी सुभाष नॅशनल इन्स्टिट्यूट ऑफ स्पोर्ट्स हांगां घेतलें जाल्यार, ताचो तुमी लाव घेवं शकतात. धनुर्विद्या, एथलेटिक्स, बॅडमिंटन, बास्केटबॉल, बॉक्सिंग, केनोयिंग, कायाकिंग सायकलिंग, फेन्सिंग, फुटबॉल, जॅमनेस्टीक, हॅण्डबॉल, हॉकी, ज्युडो, कबड्डी, खो- खो, रोईंग, शूटिंग, स्विमिंग, टेबल टेनिस, तायक्वांदो, व्हॉलिबॉल, वेट लिफ्टिंग, रेसलिंग, वुशू आनी योग अशे वेंचिव खेळ तातूंत आस्पावतात. ह्या शिक्षणान तुमी डिप्लोमा घेवंचो आनी जर तुमी 21 ते 35 ह्या पिराये भीतर आसात तर www.nsnis.org ह्या संकेतस्थळाक जरूर भेट दिवन अधिक म्हायती घेवची. 31 एप्रिल मेरेन तुमी अर्ज करूंक शकतात. खुल्या वर्गान स, राखीव गटान स, एस टी जाग्यार दोन अशो सुवाती आसात. हातून निवड जाल्ल्या उमेदवारांक किट, प्रवास खर्च, निवास वेवस्था आनी अर्ज फियेचे मेळून जो खर्च जातलो ताका सरकार मजत करतले.
गोंयच्या इत्सुकांनी फुडलीं पावलां उखलचीं. तुमकां खेळां शिक्षण हांगां घेवपाची सुविधा आसा, ताचो लाव लेगीत हेर उमेदवारांनी घेवं येता. अर्थात तांकां वेगळी येवजण आसची ना. तुमची जर आवड आसत तर आपुण खेळगडी ना जालो तरी दुसऱ्याक घडोवं शकतात, हो आत्मविश्वास तुमचे मदीं आसपाक जाय. तुमी जेन्ना हें शिक्षण घेतले तेन्ना तुमका देशा भितरूच न्हय तर संवसारान ह्या खेळाची स्थिती कितें आसा हें कळुंक लागतलें. ते नजरेन तुमी विचार करूंक शकतात. लोकप्रीय खेळा भितर सर्त आसता हें अजाप न्हय, पूण हांव सराव करतना अशा खेळाक महत्व दितलों, जो आपले वांगडा देशाचें नांव लेगीत वयर येतलें हांचो स्मार्ट विचार तुमी करपाक जाय.
गोंया भितर डॉन बॉस्को पणजे तुमका बीपीएड करपाक मेळटा. शेजारच्या राज्यांनी शिक्षण दिवपी जायत्यो संस्था आसात, तांची संकेतस्थळा जरूर पळयात. त्यो संस्था नोंद जाल्ल्यो आसात काय नात तें पळयात आनी मागीर विचार करात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
