भांगरभूंय | प्रतिनिधी
फाटल्या लेखांत आमी खेळां भितर करियर हाचेर उलयताले. तुमकां फिटनेसाचो व्हड लाव हांगां जाता, जो खंयच्याय करियर करतल्याक उपेगी पडटलो, हातूंत दुबाव ना. फाटल्या लेखान म्हणिल्ले प्रमाण, तुमी जर लोकप्रिय खेळांत जर तुमकां करियर करपाचें आसा तर तुमका नाउमेद जावपाच्यो लेगीत घडणुको घडटात हें मतींत दवरात. तसेच तुमच्या शरीरयश्टीक फाव तो खेळ तुमी निवडशात तर अधिक बरें. हांगा पी. व्ही. सिंधूचें उदाहरण दिवचें कशें दिसता. सिंधू उंच आसा, पूण ताणें बास्केटबॉला सारको ना जाल्यार व्हॉलीबॉल सारको खेळ वेंचू येतालो, पूण ताणें निवड केली ती बॅडमिंटनाची. हातूंत तिणें इतिहास घडयलो. अर्थान हाचे खातीर खूब मेहनत तर घेतलीच, शिवाय काय पथ्यां पाळ्ळीं. हे खातीर तिणें खाजगी कोच निवडले. गोपिचंद पुलेलाच्या अकादमीन सुरवात केली. तांचें मार्गदर्शन घेतले. थंयचे कडक नेम पाळ्ळे. सप्तकांतल्यान एकदा मोबायल पळोवप, असोय एक नेम आशिल्लो खंय. उंचेल्या पांवड्यार पावतकच तिणें परदेशी कोच किम जी हायन निवडलो. तांची फी तशी व्हड आसता, पूण मागीर येश मेळटा तशें तुमकां तें परवडूं शकता.
ह्या फाट्यान तुमी वचूंक सोदता तर तुमी खेळगडी म्हणूनूय वचू शकतात, ना जाल्यार मार्गदर्शक/ कोच म्हूण काम करूं शकता. निवेदन, खबरां पत्रां तशेच टीव्ही वाहिन्यां खातीर खेळाचें वार्तांकन करप, आकडेवारी तज्ञ, खेळां सामान विक्री दुकान, व्हड सर्ती आयोजित करपी आयोजक, पंच, खेळांचो विश्लेषक तज्ञ, शारीरिक शिक्षक, शिक्षिका जावं शकतात. हो अभ्यासक्रम शिकपा खातीर नामनेच्यो संस्था आसात. गोंयांत पणजे डाॅन बॉस्को संस्थेची बीपीएड शिक्षण दिवपी संस्था आसा. हाचे पयलीं इत्सुकांक गोंया भायर वचून शिकचें पडटालें. जर तुमकां खेळा भितर आवड आसा तर खेळाचे नेम खबर आसपाक जाय. देखीक तुमी जर सुब्रोतो मुखर्जी चषका खातीर पंगड व्हरता, तर तुमका सुब्रोतो कोण आशिल्लो, हाची थोडी तरी म्हायती जाय. सुदैवान हालींच्या तेंपार संकेतस्थळाचेर सगली म्हायती मेळटा.
हालींच जाल्ले राष्ट्रकुल सर्तीन महाराष्ट्राच्या बीड वाठारांतल्या मांडवा गांवच्या तरणाट्यान इतिहास घडयलो. अविनाश साबळे अशें ताचें नांव. फाटलीं 34 वर्सा स्ट्रीपल चेस ह्या खेळां प्रकारान भांगर, रुपें आनी कांश्यें अशा तिनायचेर फक्त आनी फक्त केनयाचे खेळगडी आपलें नांव कोंरताले, पूण अंदूं दुसऱ्या
नंबराचेर अविनाश आयलो आनी केनियाचे सुवातीक जबरदस्त धपको दिलो.
शेतकरी कुटुंबात जल्माक आयिल्लो अविनाश बारावी पास जातुकूच लश्करांत गेल्लो. थंय ताणें भरपूर त्रास घेतलो आनी सरावाचेर भर दिवन इतिहास घडयलो. ताच्याच तालुक्यांतलो एक कॉलेज पीएचडी प्राध्यापक गोविंद कदम हांचे लागीं मुद्दम भासाभास केली. तो म्हणटा, खेळां भितर सरावाक पर्याय ना. तो स्वतः उत्कृष्ट व्हॉलिबॉल खेळगडो, जो राष्ट्रीय संघान खेळिल्लो आसा, एमपीएड शिक्षण घेवन लेगीत ताका दोन वर्सा पगार घे नासतना एके काॅलेजींत शिकोवचें पडलें. (हें खूब जाणांक कठीण वतलें.) मागीर ताणें नेट/ सेट परीक्षा दिवन येश मेळयले उपरांत विवेकानंद कॉलेजान थीर अशी नोकरी मेळ्ळी. तो म्हणटा, खेळांनूच म्हाका हार जीत शिकयली म्हूण तर हांव अपेशाचेर मात करूंक शकलों. आतां तो आपली खेळांतली आवड बरे भशेन पुराय करूंक शकता. आपल्या विद्यार्थ्यांक तो सगली म्हायती दिता ते खेळांत येवचें म्हूण यत्न करीत आसा.
खेळा भीतर तुमी एक खेळगडो म्हणून नांव आनी पयसो जोडूं शकतात. हे खेरीज पंच, कोच, तीन स्तरांचेर काम करूं शकतात, योग कोच, खेळां विज्ञान, फिजिओथेरेपिस्ट, आहार तज्ञ, खेळ समुपदेशक, वेवस्थापनाची संद, खेळाचें उत्पादन विपणन, आकडेवारी तज्ञ, निवेदन, टीव्ही, प्रिंट मीडिया खातीर वृत्त संचालन करपी, सोशल मीडिया कन्टेन्ट तज्ञ, संगणकाचे मजतीन खेळाचो निश्कर्श काडपी तज्ञ… हे खेरिज आनीक बऱ्योच गजाली तुमी करूं शकतात. ह्या शिक्षणाची म्हायती तुमकां अभ्यासक्रमांत मेळटा. देशांत नामनेच्यो संस्था आसात. संवसारांतलीं पांच खेळां विद्यापिठां आसात,
लेब्रॉ युनिव्हर्सिटी लंडन, युनिव्हर्सिटी ऑफ प्रिन्सलॅंड
ऑस्ट्रेलिया, युनिव्हर्सिटी ऑफ ब्रिटिश कोलुम्बिया कॅनेडा, युनिव्हर्सिटी ऑफ सिडनी ऑस्ट्रेलिया युनिव्हरस्टी ऑफ टोरोंटो. आशियात भितर 13 खेळां विद्यापीठ लोकप्रिय आसा तर आमच्या देशांत एनआयसी पतियाळा (https://nsnis.org), गोंयांनूच शारीरिक शिक्षण पदवी दिवपी पणजेची डॉन बॉस्को संस्था https://donboscogoa.ac.in
तुमी हेर संस्थांची म्हायती नेटाचेर सहज सोदुं शकतात. जर तुमी परदेशांत शिक्षण घेतलें तर तुमची फाटकभूंय, संवाद शैली, नेतृत्व गुण, इंग्लेश भास, खेळांतली रुची, टोफेल परीक्षा हांचेर भर दिवचो पडटलो.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
