भांगरभूंय | प्रतिनिधी
भांगरभूंय । प्रतिनिधी
पणजीः आंतरराष्ट्रीय क्रिकेट स्टेडियमा खातीर धारगळची स्पोर्ट्स सिटीची सुवात वापरूंक नाशिल्ल्यान खेळां खात्यान गोंय क्रिकेट असोसिसएशनाक (जीसीए) नोटीस काडल्या. 15 दिसां भितर नोटिशेक जाप दिवपाक सांगलां. जर योग्य जाप दिवंक ना जल्यार खेळां खातें ही सुवात परतून घेतले, अशें खेळां मंत्री गोविंद गावडे हांणी सांगलें.
गोंयांत आंतरराष्ट्रीय दर्जाचो क्रिकेट स्टेडियम केन्ना आनी खंय जातलो हाचेर अजूनय कोफुसांव चल्लां. स्टेडियमा खातीर पेडणें म्हालांत धारगळं आनी दिवचल म्हालांत म्हावळींग्यां सुवात पळयल्या. पूण खंयचे सुवातीचेर हो स्टेडियम बांदतले हाचेर अजूनय स्पश्टीकरण ना.
हाचेर जाप दितना मंत्री गोविंद गावडे हांणी सांगलें, जीसीए वांगडा कबलात करून धारगळची सुवात स्टेडियमा खातीर दिल्ली. थंय अजून कसलेंच काम सुरू जावंक ना हें आमच्या लक्षांत आयलां. देखून आमी तांकां नोटीस काडल्या. तांणी रितसर 15 दिसां भितर जाप दिवप गरजेचें आसा. तांची जाप आमचे कडेन आयल्या. जर आमी घातिल्ल्या अटींक ते पाळो दिवंक अपेशी थारले आसत आनी योग्य जाप दिंवक ना जाल्यार आमी ही सुवात परतून ताब्यांत घेतले, अशें गावडे हांणी सांगलें.
आमी ही नोटीस धारगळ स्पोर्टस सिटी संदर्भात जारी केल्या आनी जीसीएन पळयल्ले दुसरे सुवातींचो आमचे कडे प्रस्न येना. आमचें मत स्पश्ट आसा. जी जाप दिल्या ती कायदेशीर दिश्टीकोनांत योग्य आसा काय ना तें पळोवचें पडटलें, अशी म्हायती गावडे हांणी दिली. तशेंच गोंय क्रिकेट असोसिएशन आनी गोंय फुटबॉल असोसिसएशना कडल्यान जावपी मैदानाचे मागणेचेर गावडे हांणी मत मांडलें.
जीसीए आनी जीएफए कडल्यान मैदानाची मागणी करपा खातीर रितसर अर्ज आयल्यात. शक्य आसा तितलीं मैदानां दिवपाचे आमी यत्न करतात, अशें गावडे हांणी सांगलें. फक्त तांकांच न्हय जाल्यार हेर क्लबांक आमी मैदानां दिवपांचे यत्न करतात. उर्तोडा स्पोर्टींग क्लब, बाणवले, सांताक्रूज आनी हेर पंचायतींक आमी मैदानां दिल्यात. जीसीए आनी जीएफए ह्यो संवेदनशील संघटणां आसात. तांणी मागणी केल्या तशी सगळ्यांक एकाच वांगडा मैदानां दिवपाक मेळची नात. लोकांक विस्वासांत घेवन कांय उपाय करपाची आमची मनाची तयारी आसा, अशें गावडे हांणी सांगलें.
खेळां नेमांक पाळो दिना जाल्यार कारवायः गावडे अंतर्गत केस्तांव आनी कदेली खातीरच्या राजकारणाक लागून खेळगड्यांचो फुडार पेड्डेर जाला हें आमच्या लक्षांत आयलां, हें बंद जावपाक जाय. हे खातीर खेळां नेमांची अंमलबजावणी खूब गरजेची. हे खातीर आमी खेळां संघटणां कडेन पत्रवेव्हार आनी ईमेल बरोवन ह्या खेळां नेमांची खरसाणीन अंमलबजावणी करून ताका पाळो दिवपाक सांगलां. हें करपाक अपेशी थारले जाल्यार तांकां येवपी निधी बंद करतले, अशी शिटकावणी खेळां मंत्री गोविंद गावडे हांणी दिली.
खेळां खात्याचे नोटिशेक दिल्या जापः विपूल फडके
धारगळेच्या आंतरराष्ट्रीय क्रिकेट स्टेडियमा संबंदांत खेळां खात्यान जूनांत जीसीएक नोटीस धाडिल्ली. ते प्रमाण कांय दिसां आदींच नोटिशेक जाप लेगीत दिल्या, अशी म्हायती जीसीएचे अध्यक्ष विपूल फडके हांणी सोमारा ‘भांगरभूंय’ कडेन उलयतना दिली. आंतरराष्ट्रीय क्रिकेट स्टेडियम धारगळे बांदपाचे निश्चीत करून ते संबंदांतले गरजेचे परवाने आमी मेळयल्यात. जे सुवातेर स्टेडियम बांदतले थंयच्यान उच्च दाबाच्यो वीज सरयो वतात. तशेंच खांबेय आसात. थंयच्यान ते काडपाची गरज आसा. ते संबंदांत वीज खात्या कडेन आपली चर्चा चालू आसा. वीज खात्यान उच्च दाबाची वीज सरी दुसरे वटेंतल्यान घेतल्या हेर कामां पुराय करून प्रत्यक्ष स्टेडियमाचें बांदकाम सुरू जातले. धारगळच्या आंतरराष्ट्रीय क्रिकेट स्टेडियमा खातीर सुमार 250 कोटींचो खर्च अपेक्षीत आसा. ते खातीर बीसीसीआय कडल्यान लेगीत जीसीएक निधी मेळटलो, अशें फडके हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
