खेळगड्यांनी जबाबदारी घेवची

भांगरभूंय | प्रतिनिधी

पयलीं सरकार खेळा कडेन आडनदर करतालें. तांचेर खर्च करपाक फाटीं फुडें सरतालें तेन्ना खेळगडे सरकाराचेर अपेसाचे खापर फोडून मेकळे जाताले. पूण आतां तांकां तशेंय करूंक मेळचें ना.

फ्रान्साची राजधानी आशिल्ल्या पॅरीस शारांत हालींच ऑलिम्पीक सर्त जाली. सदचे प्रमाण हे फावटी लेगीत भारतीय खेळगड्यांनी निरशेणी हाडपी कामगिरी केली. पदकांचे वळेरेंत भारत 71 व्या क्रमांकाचेर उरलो. ह्या वेळार भारताक फक्त स पदकां मेळ्ळीं. तातूंत एक रुप्या पद जाल्यार 5 कांश्यां पदकां मेळ्ळीं. 145 कोटी लोकसंख्या आशिल्ल्या देशांत फक्त स पदक मेळप आनी तातूंत एकूय भांगरा पदक नासप ही व्हड निरशेवणी हाडपी गजाल आसा. फाटल्या ऑलिम्पिकांत भारताक सात पदकां मेळिल्लीं आनी तातूंत एका भांगरा पदकाचोय आस्पाव आशिल्लो. ह्या वेळार ताचे परसूय उणीं पदकां मेळ्ळीं.
तशें पळोवंक गेल्यार ह्या ऑलिम्पिकांत भारत पदकांचो दोन अंकी आंकडो गाठुये अशी अपेक्षा आशिल्ली. कारण ह्या वेळार भारतीय पंगड पूर्ण तयारेन देंविल्लो. 117 खेळगड्यांच्या भारतीय पंगडांत खूबशे खेळगडे अशे आशिल्ले की जांचे कडल्यान भारताक पदकांची आशा आशिल्ली. चड करून बॅडमिंटन, नेमबाजी, टेबल टॅनीस आनी कुस्ती ह्या खेळांतल्यान भारताक हे फावटी पदकांची चड आशा आशिल्ली. पूण सगल्यांनी निरशेणी हाडली.
बॅडमिंटन खेळगडे चवथ्या क्रमांकाचेर उरले. जी गत बॅडमिंटन खेळगड्यांची जाली तीच नेमबाजांची जाली. टेबल टॅनिस खेळगड्यांनी जाल्यार पुराय निरशेवणी हाडली. कुस्तींत निमाण्या खिणाक भारताक एक कांश्या पदक मेळ्ळें. वास्तवीक कुस्तींत भारताक आनीक पदकांची अपेक्षा आशिल्ली. नेमबाजांनी थोडीभोव देशाची लज राखली अशें म्हणल्यार चुकीचें थारचें ना. तातूंत एकल्या मनू भाकरान दोन पदकां मेळयलीं. तिका सरबज्योत सिंग आनी स्वप्नील कुसाळेन सांगात दिल्ल्यान फक्त नेमबाजींत भारताक तीन पदकां मेळ्ळीं. भालोफेक खेळगडो नीरज चोप्रान एक रुपें जाल्यार हॉकी पंगडाक कांश्या पदक मेळ्ळें. हेर खेळगड्यांनी जाल्यार ऑलिम्पिकांत फक्त हजेरी लावपाचें काम बेस बरें केलें.
भारताच्या ह्या निरशेवणी कामगिरीची पुराय जबाबदारी ही खेळगड्यांचीच आसा. कारण सरकारान तांची जबाबदारी पूर्णपणान पार पाडिल्ली. सरकारान ऑलिम्पीक तयारी खातीर साठ हजार कोटी रुपया खर्च केल्ले. खेळगड्यांक जाय त्यो सगल्यो सोयी सुविधा दिल्ल्यो. खेळगड्यां खातीर देशांतले तशेंच विदेशांतलेय तज्ञ प्रशिक्षक नेमिल्ले. खेळगड्यांक सर्वोत्तम प्रशिक्षण दिवपाचो यत्न सरकारान केलो, तरी लेगीत खेळगडे देशाक पदक जिखूंक दिवंक शकले नात हाका कितें म्हणप?
पयलीं सरकार खेळा कडेन आडनदर करतालें. तांचेर खर्च करपाक फाटीं फुडें सरतालें तेन्ना खेळगडे सरकाराचेर अपेसाचे खापर फोडून मेकळे जाताले. पूण आतां तांकां तशेंय करूंक मेळचें ना. सरकारान तांकां सर्वोत्तम प्रशिक्षण दिवपाचो यत्न केल्लो आसतनाय खेळगड्यांनी निरशेवणी हाडपी कामगिरी केली ही हुस्को वाडोवपाची गजाल आसा. खेळगड्यांनी आतां जबाबदारी घेवंक जाय. आतां ऑलिम्पीक सर्त सोंपली. भारताच्या निरशेवणी हाडपी कामगिरीची दखल वरिश्ठ पांवड्यार घेतल्या आसतलीच. ह्या वेळार खेळगड्यां कडल्यान ज्यो चुकी जाल्यो त्यो फुडल्या ऑलिम्पीक सर्तींत जावच्यो नात हाची दक्षताय खेळगड्यांनी घेवंक जाय. फुडल्या ऑलिम्पिकांत हाची पुनरावृत्ती जावची ना हाची दक्षताय खेळगड्यांनी घेवंक जाय. आपल्या ह्या निरशेवणी हाडपी कामगिरीन देशांतल्या लोकांक निरशेवणी तर येताच पूण देशाची मान लेगीत बागवता हाचें भान खेळगड्यांनी दवरूंक जाय.

श्याम ठाणेदार
9922546295