भांगरभूंय | प्रतिनिधी
नवी दिल्ली, खबरां संस्था ः भारत आनी ऑस्ट्रेलिया हांचे मदीं पांच कसोटी मॅचींच्या माळेंतली तिसरी मॅच गाबा मैदानाचेर जाली. ही मॅच अनिर्णित उरली. तिसरे कसोटींत भारताक जैत मेळोवपा खातीर 275 धांवड्यांचे लक्ष्य आशिल्ले. दुसऱ्या डावांत भारतान कसलीच विकेट हारनासतना 8 धांवड्यो केल्यो, उपरांत पावसाक लागून मॅच थांबयली आनी निमाणे मॅच अनिर्णित म्हूण घोशीत केली. ह्याच मॅची उपरांत रविचंद्रन अश्विन हांणी निवृत्तीची घोशणा केल्या.
38 वर्सां पिरायेचो रविचंद्रन अश्विन हो भारताचो दुसरो सगळ्यांत चड विकेट घेवपी खेळगडो. अश्विनाच्या नांवार 537 कसोटी विकेटी आसात आनी तांणी 37 खेपे एका डावांत पांच विकेटी घेतल्यात. तशेंच कसोटी क्रिकेटांत 11 फावटीं प्लेयर ऑफ द सिरिज जिखून तांणी श्रीलंकेचो मुथय्या मुरलीधरनाच्या विक्रमाची बरोबरी केल्या. स्पिनर म्हणून अश्विनाचो 50.7 हो स्ट्रायक रेट (200+ विकेटी खातीर) आतां मेरेनचो सगळ्यांत बरो मानतात.
भारतीय पंगडांत तांणी केल्ल्या कामगिरीक लागून क्रिकेट मोगींच्या मनांत तांणी कायमस्वरूपी सुवात निर्माण केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
