भांगरभूंय | प्रतिनिधी
पणजी: पक्ष विरोधी कारवायांनी गुथिल्ल्या फुडाऱ्यांचेर कारवाय करपाक प्रदेश काँग्रेसीन सुरवात केल्या. वादग्रस्त खेमलो सावंत हांकां मंगळारा पक्षांतल्यान काडून उडयलो. सावंत हांकां पक्षांतल्यान निलंबीत करीत आशिल्ल्याचें पत्र प्रदेशाध्यक्ष अमीत पाटकार हांणी मंगळारा जारी केलें. तशेंच फुडारांत पक्षविरोधी कारवाय करप फुडारी, पदाधिकारी हांचेर अशेच तरेची कारवाय करतले अशी शिटकावणी तांणी ‘भांगरभूंय’ कडेन उलयतना दिली.
खेमलो सावंत हे फाटले विधानसभा वेंचणुकेंत काँग्रेसीचे सांवड्डेंचे उमेदवार आशिल्ले. पक्षाच्या खूबशा म्हत्वाच्या जबाबदाऱ्यांचेरूय तांणी काम केलां. पूण विधानसभा वेंचणुके उपरांत अमीत पाटकार हांची प्रदेशाध्यक्षपदार नेमणूक जायत सावन खेमलो सावंत पक्ष आनी पाटकार हांचेर सेगीत टिका करताले. ताची दखल घेवन तांकां पक्षांतल्यान काडून उडयल्यात. हे कारवायेक लागून खेमलो सावंत हांकां पक्षाचें नांव, बॅनर तशेंच चिन्नाचो वापर करूंक मेळचो ना. पक्षाचे खंयचेच कार्यावळींत हाजीर रावंक मेळचें ना अशें पाटकार हांणी पत्रांत म्हणलां.
येता ते जिल्हो पंचायत, पालिका तशेंच विधानसभा वेंचणुकेचे फाटभुंयेर प्रदेश काँग्रेसीक चाळिसूय मतदारसंघांनी घटाय दिवपाचो यत्न पाटकार हांणी सुरू केला. पूण पक्षांतले कांय वरिश्ठ फुडारी तातूंत आडखळी हाडत आशिल्ल्याचें आनी पक्ष विरोधी कारवाय करीत आशिल्ल्याचें फाटल्या कांय म्हयन्यांत प्रदेश काँग्रेसीच्या वरिश्ठ फुडाऱ्यांचे नदरेक आयिल्लें. ताका लागून पक्ष घटमूट करीत आसतना पक्ष विरोधी कारवायांनी गुथिल्ल्यांचेर खर कारवाय करपाचो निर्णय प्रभारी माणिकराव ठाकरे, प्रभारी सचीव अंजली निंबाळकर आनी प्रदेशाध्यक्ष पाटकार हांणी घेतिल्लो. ते प्रमाण मंगळारा खेमलो सावंत हांचेर निलंबनाची कारवाय केली.
आनीक कांय फुडारी रडाराचेर
खेमलो सावंत हांचे प्रमाणूच आनीक कांय फुडाऱ्यांनी फाटल्या कांय वर्सांत पक्षांत रावन पक्षा आड कारवायो केल्ल्याचें पक्षाचे नदरेक आयलां. अशे फुडारी प्रदेशाध्यक्ष अमीत पाटकार हांच्या रडाराचेर आसून फुडारांत तांचेरूय कारवाय जातली अशी म्हायती प्रदेश काँग्रेसींतल्या गोपांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
