भांगरभूंय | प्रतिनिधी
आमकां क्रिकेट खेळगडे आनी सिनेमा अभिनेत्यांचें कितलें आकर्शण आसा, तें वेगळें सांगपाक नाका. तांचें दर्शन जावचें म्हूण आमचेच कांय भाव भुती बांदून दिसभर तांच्या बंगल्या भायर बशिल्ले आसतात. कांय फोटो पत्रकार (?) नट, खेळगड्यांचे, तांच्या ल्हान भुरग्यांचे फोटो, व्हिडियो मेळचे म्हूण अक्षरशा ‘सर, मॅडम, प्लीज…’ अशें विनवणी करीत तांच्या फाटल्यान भोंवतात. जायत्या जाणांनी सोशल मिडियाचेर तांचो आवाज आयकलाच आसतलो? ह्या आकर्शण, पिशेंपणाचो वसो फाटलीं 75 वर्सां आमच्यो पिळग्यान पिळग्यो घेत आसात. आयज तर मोबायल फोनाक लागून हें चडूच वाडलां. कोणूय सिनेमा नायक, नायिका, क्रिकेटर आयलो जाल्यार आमी भरिल्ल्या ताटा वयल्यान उठून ताका पळोवपाक धांवतात. तांचेर आशिल्लो हो मोग म्हणपाचो काय आनीक कितें, तें कळना. मागीर गर्दी जाली काय खेटाखेट जाता आनी आमीच मरतात. जाका पळोवपाक गेल्ले तांकां कांय जायना. बंगळुरांत नेमकें हेंच जालें. पयरचें राॅयल चॅलेंजर्स बंगळुरू पंगडाचें जैत मनयतना जाल्ले खेटाखेटीत 11 जाणांक मरण आयलें, तर 50 वयर जखमी जाले.
ही दुर्घटना जातकच, सगल्यांनीच हात वयर केले. पुलीस म्हणटात, बंदोबस्त दवरिल्लो. सरकार म्हणटा, आमी कार्यावळ आयोजीत करूंक नाशिल्ली. फक्त आमी थंय सत्कार करपाक गेल्ले. कर्नाटक क्रिकेट संघटणा आनी आरसीबीय जापसालदारकी घेवपाक तयार ना. हो खो- खो चो खेळ पळोवन कर्नाटक उच्च न्यायालयान स्वता मुखार येवन ह्या प्रकरणाची दंडाधिकाऱ्यां वतीन चवकशी करून 15 दिसां भितर अहवाल दिवपाक सांगलां. सरकारान सीआयडीचें विशेश कृती दळ नेमून चवकशी करपाचें उतर कोर्टाक दिलां. हे व्हडले दुर्घटने उपरांत राजकी फुडारी आनी तांचे वावुरपी थयथयाट करिनात जाल्यार तें अजापूच थारपाचें. सगल्याच राष्ट्रीय चॅनलांनी हाचेर भासाभास केली आनी तातूंत वांटो घेवप्यांनी बुडकुले एकमेकांचे तकलेर फोडले. थोड्यांक कुंभमेळा, मुंबय रेल्वे स्टेशना वयली खेटाखेट याद जाली. शिरगांवचे दुर्घटनेचोय उल्लेख जालो. भाजपाक विरोधी पक्षांचीं सरकारां आसात, त्या राज्यांतल्यो तर काँग्रेस आनी हेर विरोधकांक भाजपा सरकारां आसात, त्या राज्यांतल्यो दुर्घटना याद जाल्यो. कसलीय दुर्घटना जाता, तेन्ना अशे एकमेकांचेर आरोप करून ताका राजकी मोडण दिवप बरोबर न्हय. ताचे परस दुर्घटना, अपघात कशें टाळू येतात, हाचेर भासभास जावपाक जाय. मात हें जायना. घडये एकमेकांचेर आरोप करून वाद घालपाक लावपी नवो डीएनए आमच्या रक्तांत तयार जाला आसतलो.
आरसीबी हो नांवां पुरतो बंगळुरूचो म्हणल्यार कर्नाटकाचो पंगड. तातूंत चार विदेशी खेळगडे आसात आनी उरिल्ले विवीध राज्यांतले. तातूंत कर्नाटकांतलो एकलोय ना. पंगडाची धनी युनायटेड स्पिरीट्स लिमिटेड. ती ब्रिटनाचे कंपनीन विकत घेतल्या. 2016 मेरेन ती कोंकणी मनीस विजय मल्ल्या हांचे मालकीची आशिल्ली. अर्थीक भानगडींत नांव येतकच मल्ल्या देश सोडून गेले. सांगपाचें म्हणल्यार कर्नाटका कडेन फक्त नांवा पुरतो संबंद आशिल्ल्या पंगडा खातीर इतलें उंचाबळ जावपाची कितें गरज आशिल्ली? क्रिकेटीचें हें पिशें, फॅड केन्ना उणें जातलें? शारांत डबल डेकर बशींतल्यान (मुंबय काडिल्ली तशी) मिरवणूक काडल्यार जाताली. मंत्र्यांक वयर चडून खेळगड्यांचो भोवमान करूं येतालो. 35 हजारांची तांक आशिल्ल्या स्टेडियमांत भायर उबे आशिल्ले सादारण दोन लाख लोक घुसपाक पळयताले. थोडे झाडांचेर वयर चडून पळयताले. हे कार्यावळीचे पास आरसीबीचे सायटीचेर आॅनलायन मेळटाले. गेट क्रमांक सातचेर मुफत पास दितात, हें कानार पडटकच सगले थंय धांवले. प्रसादाचो दोणो घेवपाक भुरगे धांवतात, ते उमेदीन. गेट क्रमांक एक उक्ती करून लोकांक फुकट सोडपाक लागले, थंयूय गर्दी जाली. दुर्घटनेचीं हीं मुखेल कारणां, अशें सध्या तरी दिसता. आरसीबीच्या हालींच जाल्ले एके कार्यावळीक 800 ते 4000 रुपयां मेरेन तिकेटी आशिल्ल्यो. हाचे फुडें आयपीएलूच न्हय, तर दरेके सर्तीची स्टेडियमांत कार्यावळ दवरची, पूण तिकेट लावन. 500 ते 5000 रुपया तिकेट. तरीय गर्दी जाता जाल्यार फुडले फावट तिकेट दुपेटीन वाडोवची!! तो पयसो समाजसेवी संघटणांक दिवचो.
आमकां भारतीयांक सिलेब्रिटींचें कितलें आकर्शण तें खबर आसतना असलें मिरवणूक, फुकट कार्यावळींचें धाडस कित्याक करपाक जाय? बरें केलेंय जाल्यार, कितें जावपाक शकता, हाचो विचार करून भौशीक सुरक्षा दवरप, गर्दी जाल्यार ती कशी हाताळप हे विशीं उपाय घेवपाक जाय. पुलिसांनी आरसीबी, डीएनए एंटरटेनमेंट नेटवर्क आनी कर्नाटक क्रिकेट संघटणे आड पुलीस कागाळ जाल्या. मात तातूंत व्हडलेशें कितें जायतशें दिसना. मरण आयिल्ल्यांच्या कुटुंबाक दरेकी 10 लाख रुपया भरपाय दिल्या.
आमची आनी तुमची खेटाखेट नासता. देशांत घडिल्ली ही दुखेस्त घडणूक. तिची जापसालदारकी सगल्यांचीच. ही कार्यावळ पळोवंक गेल्ल्यांची चड. खेटाखेट जावची न्हय, हे खातीर कितें उपाय घेवपाक मेळटले, तें पळोवंक जाय. लोकांनीय शाणें जावंक जाय, ‘एक्टर, क्रिकेटर’ हांचे विशींचें आकर्शण उणें करपाचेरूय समाजान विचार करपाचो आयज वेळ आयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
