भांगरभूंय | प्रतिनिधी
सोशल मिडियाचेर कोण आसात, तांकां कमेंट बाॅक्सांत कांय जाण मोये मोये बरयतना दिसतात. कितें काय हें मोये मोये. गोंयांत मोये आडनांवाचे खूब लोक आसात. तांचो बी हाचे कडेन संबंद आसा? ना. हें एक सर्बियन पद. ताचो व्हिडियो तुमी पळयला आसतलो. हो ट्रेंड पयलीं टिकटोका वरवीं लोकां मेरेन पावलो. हातूंत जायत्या टिकटोककारांनी ‘मोये मोये’ ह्या डझनम पदाचो एक भाग जावन ताचेर आपल्याक आवडटा तसो व्हिडियो तयार केलो आनी शेअर केलो. फुडें ह्या गीताचें पिशें इंस्टाग्राम, फेसबूक, युट्युब ह्या सगळ्या सोशल मिडियाचेर पातळ्ळां.
पूण एक गजाल आयकून तुमकां धक्को बसतलो तो म्हणल्यार ‘मोये मोये’ नांवाचें लोकप्रिय गीत आमच्या भारतांत जायत्या वर्सां आदीं सादर जाल्लें. इतलेंच न्हय, भारतांत प्रदर्शीत जाल्लें हें ‘मोये मोये’ गीत एका नामनेच्या पंजाबी गायकान गायिल्लें. ह्या गायकाचे नांव आसा दलेर मेहंदी. कितल्याशाच वर्सां आदीं दलेर मेहंदीन ‘मोये मोये’ ह्या गीताचेर भारतीयांक नाचपाक लायिल्लें.
हालींच ‘द लल्लनटाॅप’ ह्या चॅनलाच्या ‘गेस्ट इन द न्यूजरूम’ कार्यावळींत दिलेर दिसलो. हे मुलाखती वेळार तांणी ही गजाल उक्तायली. हाचे वांगडाच तांणी ‘मोये मोये’ चो नेमको अर्थूय सांगलो. मेहंदीन म्हणलें, ह्या गीताचो अर्थ मरप. पुराय ओळ- ‘चुन्नी नाल मुखडे नु ढकनी, अंसी मोये- मोये’ म्हणल्यार मोगा, ओढणेन तुचें मुखामळ धाप, नाजाल्यार म्हजें कांय खरें ना. तुजेर नदर पडटकच हांव मरतलों”
हें ‘मोये मोये’ 1996 वर्सा ‘दर्दी रब रब’ ह्या आल्बमा खातीर दिलेर मेहंदीन रेकॉर्ड केल्लें. सध्या मेहंदीच्या गीताची आनी सर्बियन गीताची तुळा करपी व्हिडियो सोशल मिडियाचेर व्हायरल जावपाक लागला. हाकाच लागून दलेर मेहंदीचें हें पोरणें गीत लोकांक याद जाता. हें पळोवन हांव खूब खोशी जाता अशें तांणी हे मुलाखतींत स्पश्ट केलां.
ह्या पदाचें मूळ उतर मोजे मोर. पूण उच्चार मोये मोर. हाचो अर्थ म्हजीं वायट सपनां. पूण मोये मोये उतर लोकप्रीय जालां. टेया दोरा ही ताची गायिका. ६ कोटी लोकांनी तें शॅर केलां.
आताचें मोये मोये सर्बियन भाशेंत आसलें तरी ताका संवसारभर अफाट लोकप्रियता मेळ्ळ्या. हाचे वयल्यान संगीताक भाशा लागना हो विचार सत्य थारला. संवसारांत आमी खंयच्याय सुवातेर आसूं, संगीत आमकां सगळ्यांक एकठांय बांदपाचें काम करता, हें खरें.
सर्बियन पदाचो व्हिडियो युट्यूबाच्या बरेपणान
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
