खून प्रकरणांत दुबाविताक जल्मठेपेची ख्यास्त

भांगरभूंय | प्रतिनिधी

आकय-म्हापश्यां – भावानूच भावाचो केल्लो खून

पणजी : आकय-म्हापश्यां सोऱ्याचे घुवळेंत घरांत झगडीं करपी विलास वसंत केरकार हाचो खून केल्ले प्रकरणांत ताचो भाव ज्ञानेश्वर केरकार हाका न्यायालयान जल्मठेपेची ख्यास्त दिल्या. जाल्यार विलासाक पायपान मारपेट केल्ले प्रकरणांत सदोश मनीसवधाचो गुन्यांव आशिल्लो ताचो भाव विनोद हो दुयेंत आशिल्ल्यान ताणें भोगिल्ल्या बंदखणीची ख्यास्त गृहीत धरून ताची सुटका केल्या. हे विशींचो निवाडो उत्तर गोंय जिल्हो आनी सत्र न्यायालयाचे प्रधान न्यायाधीश शैरीन पॉल हांणी दिला.

नेमके प्रकरण कितें?

22 डिसेंबर 2019… वेळ रातीचीं 8.45 मिणटां… थळ आकय क्लबा लागी.. विलास सदचे भशेन सोरो पियेवन घरा आयलो आनी न्हांवपा खातीर बाथरुमांत गेलो. न्हांवन आयले उपरांत ताणें भयण गिता केरकार हिचे कडेन तुवालो मागलो. ह्या कारणा वयल्यान व्हडलो भाव विनोद तिडकलो. ह्या विशया वयल्यान तांचे मदीं झगडीं जाली. सोऱ्याचे घुंवेळेंत अाशिल्ल्या विलासान तिडकेन व्हड भावाच्या कानसुलार थापट मारले. दोगूय एकामेकांक मारपेट करीत घरा भायर अांगणांत आयले. थंय आकय क्लबाच्या कठड्याचेर बशिल्लो ल्हान भाव ज्ञानेश्वर हाणें हो प्रकार पळयलो. ताणें धांव घेवन विलास हाका जमनीचेर पाडलो. उपरांत विनोदान ताका प्लास्टीक पायपान मारपेट केली. जाल्यार ज्ञानेश्वरान लांकडी दांड्यान ताका मारपेट केली. हातूंत विलास जखमी जालो. हे पळोवन शेजारचे ताचे मजतीक धांवले. पूण विनोद आनी ज्ञानेश्वर हांणी जखमीक उखलपाक दिले ना. ताका लागून विलासाक वेळार उपचार मेळूंक नाशिल्ल्यान ताका मरण आयलें.

मारपेटीचो प्रकार सुरू आसतना भयण गीता केरकार आनी ताच्या व्हडल्या भयणीची चली थंयच आशिल्ली. हे घडणुके उपरांत गितान म्हापशें पुलिशेंत कागाळ केली. हाची दखल घेवन तेन्नाचे पुलीस निरिक्षक तुषार लोटलीकार हांणी खुन्यांचो गुन्यांव नोंदोवन ज्ञानेश्वर आनी विनोद ह्या दोगांकूय अटक केली. ते उपरांत तपास पुराय करून म्हापशें पयलो वर्ग न्यायालयांत आरोपत्र दाखल केल्ले.

मजगतीं, खून प्रकरण सत्र न्यायालयाच्या अधिकार क्षेत्रांत आशिल्ल्यान 11 जून 2020 दिसा उत्तर गोंय जिल्हो आनी सत्र न्यायालयांत ते वर्ग केले. दोगाय भांवांच्या विरोधांत प्रत्यक्ष पळोवपी साक्षीदार आनी सबळ पुरावे आशिल्ल्याची दखल घेवन न्यायालयान आरोप निश्चीत करून खटलो सुरू केल्लो.

शुक्रारा न्यायालयांत ख्यास्तीचेर सुनावणी जाली. न्यायालयान ज्ञानेश्वराक जल्मठेप आनी 25 हजार रुपया दंड केला. दंड फारीक केलोना जाल्यार एका वर्साची अतिरिक्त बंदखण, तशेंच दंड फारीक केल्यार तातूंतले 20 हजार रुपया भयणीक भरपाय म्हूण दिवपाचो आदेश जारी केलो. जाल्यार विनोद दुयेंत आशिल्ल्या ताका जामीन मंजूर केलो. तशेंच मारपेट प्रकरणांत दोगां दुबावितांक एका म्हयन्याची बंदखणीची ख्यास्त केल्या.

सदोष मनीसवध प्रकरणांत विनोद 23 डिसेंबर 2019 ते 24 ऑगस्ट 2023 मजगतीं, कोठडेंत आशिल्लो. हो काळ गृहीत धरून ताका 5 हजार रुपया दंडाची ख्यास्त केल्या. दंड फारीक केलोना जाल्यार 6 म्हयन्यांची बंदखणीची ख्यास्त जातली.