खुबश्या घरांतलो कोयर आजूनय दिनात

भांगरभूंय | प्रतिनिधी

मोनाली बेतकेकार: बारांवश व्हिलेज ऑर्गनायझेशना वतीन नितळसाण मोहीम

वाळपय: मोर्लें पंचायत वाठारांत दरेका घरांतलो कोयर एकठांय करपाचें काम सुरू जालां. हाका गोंय मिनरल फावंडेशनाचें बरे तरेन सहकार्य मेळटा. दरेके सुवातेर वचून गोंय मिनरल फावंडेशनाचे कामगार घराघरांतलो कोयर एकठांय करीत आसतात. पूण खुबश्या घरांतलो कोयर आजूनय दिनात अशें मोर्लें पंचायतीची सचीव मोनाली बेतकेकार हांणी म्हणलें.  

मोर्लें सत्तरी हांगच्या बारावंश विलेज ऑर्गनायझेशन हे संस्थे वतीन पंचायत वाठारांतल्या खुबश्या सुवातांचेर नितळसाण मोहीम हातांत घेतली. ह्या पंचायत वाठारांत वट्ट पांच ब्लॅक स्पॉट वळखून ते सुवातेर नितळसाण मोहीम राबयली. ह्या वेळार मोनाली बेतकेकार उलयताली. 

ह्या उपक्रमाक पंचायतीचे सरपंच अमीत शिरोडकार, पंचायतीचे हेर पंच वांगडी आनी बारावंश व्हिलेज ऑर्गनायझेशनाचे पदाधिकारी व्हडा प्रमाणांत हाजीर आशिल्ले. ह्या वेळार व्हडा प्रमाणांत कोयर एकठांय केलो. हो कोयर गोंय मिनरल फावंडेशनाचे सुवादीन करपाचो आशिल्ल्यान ते ताचो विलो लायतले, अशें ह्या वेळार पंचायती वतीन स्पश्ट केलें.

पंचायत वाठारांत विवीध सुवातांचेर कोयराचे डबे दवरल्यात. तरीय खुबश्या सुवातांचेर बेकायदेशीरपणान कोयर उडोवपाचे प्रकार घडटात. भौशीक सुवातेर कोयर उडयल्यार खर कारवाय करतले आनी हे संबंदी बारीकसाणेन लक्ष दितले. सद्या मोर्लें पंचायतीच्या पांच सुवातांचेर ब्लॅक स्पॉट तयार जाल्यात. ह्या जाग्यांचेर व्हड प्रमाणांत प्लास्टीक कोयर उडयतात. हाका लागून पर्यावरणाक खूब लुकसाण जावपाक लागलां. ताका लागून पंचायती वतीन दरेका घरांत भोंवपी कामगारां कडेन प्लास्टीक आनी हेर तरेचो कोयर दिवचो, अशी मागणी मोनाली बेतकेकार हांणी केली. 

ज्या घरांतल्यान कोयर एकठांय करतात थंय क्यूआर कोड दवरतात. हाका लागून दरेका घरांतल्यान खंयचो कोयर येता हाची म्हायती मेळटा. कोयर दिना अशा लोकांनी पंचायतीक सहकार्य करून कोयर कामगारांच्या हातांत दिवचो अशी मागणी मोनाली बेतकेकार हांणी केली. 

पंचायतीचे सरपंच अमित शिरोडकार हांणी बारांवश व्हिलेज ऑर्गनायझेशना वरवीं बायलांनी आनी ह्या वाठारांतल्या नागरिकांनी नितळसाण उपक्रमांत वांटो घेवन पंचायतीक सहकार्य केल्ले खातीर सगळ्यांचे उपकार मानले.