भांगरभूंय | प्रतिनिधी
जीत आरोलकारः अब्रू लुकसाणेचो दावो करपाची शिटकावणी
भांगरभूंय । प्रतिनिधी
पेडणें: मांद्रेंचे आदले सरपंच महेश कोनाडकार हांचेर जाल्लो खुनी हल्ल्यो हो निंदा करपा सारको प्रकार. हातूंत जे कोण घुस्पल्यात तांचेर खर कारवाय करची, अशी मागणी आपणे मुख्यमंत्री डॉ. प्रमोद सावंत हांचे कडेन केल्या. गृह खातें निश्चीत दुबावितांक धरतलें. ह्या प्रकरणांत आपल्याक जे कोण घुस्पावपाचो यत्न करतात, तांचेर आपूण अब्रू लुकसाणेचो दावो करतलों, अशी शिटकावणी मांद्रें मतदारसंघाचे आमदार जीत आरोलकार हांणी दिल्या. जखमी महेश कोनाडकार हांची तांच्या घरा भेट घेतले उपरांत ते थळाव्या पत्रकारां कडेन उलयताले.
मांद्रेंचे आदले सरपंच तशेंच सध्याचे पंच महेश कोनाडकार हांचेर 5 डिसेंबराक मांद्रेंच्या आस्कावाड्यार खुनी हल्लो जाल्लो. हल्लो करतना ‘तुका मायकल जाय’ असो प्रस्न विचारून ताका बरोच जखमी केल्लो. तांचेर तुयें आनी उपरांत म्हापशें उपजिल्हो हॉस्पिटलांत उपचार केल्ले. आदले आमदार दयानंद सोपटे, थळावे सरपंच मिंगेल फर्नांडीस, आदले सरपंच अॅड. अमीत सावंत, धारगळेचे आदले सरपंच बाळा उर्फ प्रशांत नायक, उपसरपंच तारा हडफडकार, पंच किरण सावंत, धारगळचे आदले सरपंच भूषण नायक, अनिकेत साळगांवकार अश्या खूबश्या आदल्या आनी सध्याच्या सरपंच, पंचांनी हॉस्पिटलांत वचून कोनाडकार हांची खबर घेतिल्ली. त्या वेळार तांणी कांय जाणांनी आपली प्रतिक्रिया दितना हातूंत राजकारण्यांचो हात आशिल्ल्याचें म्हणिल्लें. 6 डिसेंबराक आमदार जीत आरोलकार हांणी महेश कोनाडकार हांच्या घरा वचून तांची भेट घेतली. तांची खबर घेतले उपरांत आमदार थळाव्या पत्रकारां कडेन उलयले.
मजगतीं, मांद्रेंचे लोक, आदले आनी सध्याचे पंच रातीं मांद्रें पुलीस स्टेशनार गेले. ह्या प्रकरणांत घुस्पल्ले जे पांच दुबावीत आसात तांकां 24 वरां भितर अटक करची, तशेंच तांची गाडी जप्त करची, अशी मागणी केली. ना जाल्यार फुडें कितेंय बरें वायट घडत जाल्यार ताका आमी जापसालदार आसचे नात, अशेंय तांणी पुलीस निरिक्षक नारायण चिमुलकार हांचे हाजिरेंत सांगलें.
गाडी जप्त, दोगांक अटक
मांद्रें पुलीस निरिक्षक नारायण चिमुलकार हांच्या फुडारपणा खालच्या पंगडान खुनी हल्लो करचे खातीर जी गाडी वापरिल्ली ती जप्त केल्या. तशेंच दोग दुबावितांक ताब्यांत घेतल्यात. उरिल्ल्या हेर तिगांक पुलीस सोदतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
