खुनाचो आरोप, कायद्याची पदवी, वकिली आनी……..

भांगरभूंय | प्रतिनिधी

जिद्दी तरणाट्याची स्फूर्त दिवपी काणी

लखनौ, खबरां संस्था ः खुनाचो आरोप, उपरांत कायद्याची पदवी आनी स्वताच वकिली करुन आरोपांतल्यान मुक्तताय मेळोवप…. उत्तर प्रदेशांत घडिल्ली ही खरी काणी. मेरठच्या एका तरणाट्याक 12 वर्सां आदीं खुनाच्या आरोपांत बंदखणींत वच्चें पडलें. त्या वेळार ताची पिराय फकत 18 वर्सां आशिल्ली. मेरठांत जाल्ल्या दोन पुलीस हवालदारांच्या खुनांत अमित चौधरीक आरोपी थारायलो. ताचेर गुंड असो आरोप केलो. खून जाल्लो हवालदार आशिल्ल्यान तेन्नाची मुख्यमंत्री मायावतीन ह्या प्रकरणाची दखल घेतली आनी उपरांत अमिताक फटीच्या आरोपा खाला बंदखणींत वच्चें पडलें.
जेन्ना हो खून जालो तेन्ना अमित आपले भयणी वांगडा सोयऱ्यांगेर गेल्लो. पूण ह्या प्रकरणांतल्या 17 आरोपीं वांगडा ताचेंय नांव आयलें. उत्तर प्रदेशांतल्या कुख्यात कैल गँगाचो तो वांगडी आशिल्ल्याचो आरोप करून ताचेर खून आनी हेर गंभीर गुन्यांव दवरले. हाका लागून अमित दोन वर्सां बंदखणीची ख्यास्त जाली.
उपरांत तांणे परिस्थिती आड झुजपाचो निर्णय घेतलो. आपली निरपराधीपण सिद्ध करपाक कायद्याचो अभ्यास करपाचें थारायलें. बंदखणींत ताचे वांगडा हेर गुन्यांवकार आशिल्ले, पूण तांकां सांगात दिवचे परस ताणें हांतूतल्यान भायर सरपाचेर लक्ष केंद्रीत केलें. बंदखणींतल्या अधीक्षका कडेन उलोवन ताणें आपली वेगळ्या बॅरेकांत वेवस्था करून घेतली.
दोन वर्सां बंदखणींत उरलें उपरांत 2013 वर्सा अमिताक जामीन मेळ्ळो. हांगाच्यान अमिताचो संघर्श चड खर जालो. आपल्या वयलो खून करपाचो आरोप मिटोवपा खातीर अमितान एलएलबींत प्रवेश घेतलो आनी कायद्याचो अभ्यास सुरू केलो. एलएलएम येसस्वीपणान पुराय केलें. पदवी मेळयले उपरांत ताणें बार काउन्सिल ऑफ इंडिया परिक्षेंत पास जावन सनद मेळयली. मागीर अमितान स्वताच्या प्रकरणांत युक्तिवाद करपाचें थारायलें.
अमिताच्या प्रकरणाची सुनावणी सामकी सवकास चलताली. कोणाची जाप सारकी नोंद जावंक नाशिल्ली. तपासय सारको जावंक नाशिल्लो. अमित साक्षीदार पंचाची उलटसुलट तपासणी करपाक लागलो तेन्ना एक धक्को दिवपी गजाल मुखार आयली. अमितान तपास अधिकाऱ्याक न्यायालयाच्या पांजऱ्यांत उबो करून कांय प्रस्न विचारले. पूण प्रस्न विचारपी अमिताक आपूण एक फावट अटक केल्ली हेंच त्या तपास अधिकाऱ्याक खबर नाशिल्लें. हाका लागून न्यायालयान अमिताच्या निरपराधीपणाचो अदमास काडलो.
ह्या प्रकरणाची सुनावणी जायते दीस चल्ली. उपरांत न्यायालयान निकाल दिलो. ह्या प्रकरणांत अमित चौधरी सयत 13 दुबावितांक निर्दोश मुक्त केले. निरपराधी थारायलें आनी तांची सुटका केली. हवालदार कृष्णपाल आनी अमित कुमार हांचो खून आनी तांची रायफल चोरपाच्या प्रकरणांत ह्या लोकांचो कसलोच हात ना अशें न्यायालयान स्पश्ट केलें.

खऱ्या आरोपींक ख्यास्त दिली…

अमित चौधरीचें निरपराधीपण सिद्ध जाता आसतना ह्या प्रकरणांतल्या खऱ्या गुन्यांवकारांचेरूय निवाडो दिलो. आरोपी सुमित कैल, नीटू आनी धर्मेंद्र हांकां वेगवेगळ्या कलमा खाला ख्यास्त फर्मायली. मुखेल आरोपी कैलाक 2013 वर्सा पुलिसांच्या एन्कावंटरांत मरण आयलें. खून आनी रायफल चोरी ह्या गुन्यांवांत नीटूक जन्मठेप बंदखणीची ख्यास्त फर्मायली. जाल्यार धर्मेंद्राक कॅन्सर जाल्ल्यान उपचारा वेळार मरण आयलें.

कलंक मिटलो, पूण सैनिक जावपाचें सपन उरलें…

अमित चौधरी व्हड संघर्शा उपरांत निरपराधी थारलो. पूण सैन्यांत भरती जावन देशाची सेवा करपाचें ताचें सपन उरलें. अमितान सांगलें, हांव सैन्यांत भरती जावपाचें सपन पळयतालो आनी ताची तयारी सुरु आशिल्ली. पूण २०११ वर्साचे ते एके रातींन म्हजें जिवीत बदललें. आतां फौजदारी न्याय प्रक्रियेंत पीएचडी करपाची आसा अशें अमितान सांगलें. घडये, देवान म्हाका असहाय्य लोकांक मजत करपाक वेंचून काडला आसूं येता. हेंच म्हजें नशीब आतां. देखून निरपराधी लोकांक न्याय मेळोवन दिवपाचो हांव यत्न करतलो अशें अमित चौधरी हांणी सांगलें.