भांगरभूंय | प्रतिनिधी
भांगरभूंय । प्रतिनिधी
फोंडेंः पाटवळ- खोतोडें हांगच्या खुटेश्वर स्पोर्ट्स आनी कल्चरल क्लबान आयोजीत केल्ल्या अखील गोंय अंडर आर्म क्रिकेट सर्तींत सावर्शें पाटवळ हांगच्या पंगडान वस्तादपण मेळयलें. तांणी फायनलींत बोर्डें बॉयज पंगडाच हारयलें. अरविंद गांवकारान मॅन ऑफ दी मॅच आनी कालिाक बॉयजाच्या राजेश गांवकार हाची मॅन ऑफ दी सिरीज म्हणून निवड केली.
10 आनी 11 फेब्रुवारीक थळाव्या मैदानार फ्लड लायटीच्या उजवाडांत हे सर्तींतल्यो मॅची जाल्यो. वट्ट 20 पंगडांनी सर्तींत वांटो घेतिल्लो. बरो बॅट्समन म्हणून अनीश खोतोडेकार आनी बॉलर म्हणून योगेश हांका इनामां फावो जालीं. इनाम भेटवण कार्यावळीक आदलो पंच वांगडी विनायक ऊर्फ दादा सावयकार, गौरेश सावयकार, कृष्णा मावळींगकार, तुषार साळकार आनी हेर मानेस्त हाजीर आशिल्ले. जयशे गांवकारान सर्तींतल्या मॅचीची कॉमेंटरी केली.
गांवगिऱ्या वाठारांत आयोजीत करतात त्या सर्तींतल्यान नवे खेळगडे तयार जातात. फुडाराक हे खेळगडे राष्ट्रीय आनी आंतरराष्ट्रीय पांवड्यार पावतले अशी आस्त इनाम भेटवण कार्यावळींत उलयतना दादा सावयकार हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
