भांगरभूंय | प्रतिनिधी
39 ए खाला जमीन रुपांतरणां रद्द करपाची मागणी
पणजी: गोंय वाटावपा खातीर ‘इनफ इज इनफ’ चळवळीन सादर केल्ल्या विधेयकाच्या मसुद्याचेर चर्चा करपा खातीर खासा अधिवेशन आपोवचें. फोंडें पोटवेंचणुके उपरांत चर्चे खातीर अधिवेशन घेवचें, अशी मागणी आदले न्यायाधीश फेर्दीन रिबेलो हांणी केल्या. नगर नियोजन कायद्याच्या कलम 39 ए खाला संमत केल्ले जमीन रुंपांतरणाचे प्रस्ताव रद्द करचे, अशी मागणी तांणी केल्या.
गोंय वाटावपा खातीर आदले न्यायाधीश फेर्दीन रिबेलो हांच्या फुडारपणा खाला ‘इनफ इज इनफ’ ही चळवळ सुरू जाल्या. हे चळवळीच्या कार्यालयाचे मंगळारा पणजेंत उक्तावण जालें. हाचे उपरांत घेतिल्ले पत्रकार परिशदेंत रिबेलो हांणी ही मागणी केली.
अधिवेशन आपोवन जमनी सुरक्षीत दवरपी विधेयकाचेर चर्चा जाली ना, जाल्यार आंदोलनाची फुडली कृती मे म्हयन्यांत थारायतले. हे विधेयक संमत जाय मेरेन चळवळ सुरूच उरतली, अशें तांणी सांगलें.
नगर नियोजन कायद्याचें कलम 39 ए रद्द करपा सयत बिगर गोंयकारांक जमीन विकपाचेर बंदी घालपाची तजवीज विधेयकांत आसा. प्रादेशीक आराखड्या प्रमाण राज्याची उदरगत जावपाक जाय, अशें तांणी म्हणलां.
गोंय वाटावपा खातीर पणजेंत जाल्ले सभेक उपाट प्रतिसाद मेळ्ळो. कलम 39 ए रद्द करपा सयत जमीन रुंपांतरणा रद्द करपाची मागणी जाली. दोशी अधिकाऱ्यांची चवकशी करून कारवाय करपाची मागणी जाली. हाचे उपरांत आदले न्यायाधीश फेर्दीन रिबेलो हांणी विधेयकाचो खासा मसुदो तयार करून तो राजकी पक्षांक धाडला. हें विधेयक चर्चेक घेवपा विशींच्यो नोटिसो विरोधी आमदारांनी दिल्ल्यो. मात फोंडें पोटवेंचणूक आचारसंहितेक लागून अधिवेशन मुजती पयलीं तहकूब जालें. हाका लागून हें विधेयक चर्चेक आयले ना. पोटवेंचणुके उपरांत खासा अधिवेशन घेवन विधेयकाचेर चर्चा करची, अशी मागणी फेर्दीन रिबेलो हांणी परतून केली.
मुख्यमंत्री डॉ. प्रमोद सावंत हांणी सांखळेंतलो जमीन रुंपांतरणाचो प्रस्ताव रद्द केलो. हे प्रमाण कलम 39 ए खाला जमीन रुपांतरणाचे सगले प्रस्ताव रद्द करचे. हे विशी मुख्यमंत्री डॉ. प्रमोद सावंत हांकां हांवें पत्र बरयलां. नगर नियोजन कायद्या खाला मुख्यमंत्री डॉ. प्रमोद सावंत हांकां हे अधिकार आसात, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
