खासदाराचीच वळख शेणली

भांगरभूंय | प्रतिनिधी

विरियातो हांकां राज्य वेंचणूक आयोगाची नोटीस

भांगरभूंय । प्रतिनिधी

मडगांव : एसआयआर खाला नागरिकांक वळख सिद्ध करपा खातीर कागदपत्रां सयत हाजीर रावपाच्यो नोटिसो धाडटात. अशीच नोटीस दक्षीण गोंय खासदार कॅ. विरियातो फर्नांडीस हांकांय आयल्या. वैध मतदारांचीं नांवां काडपा खातीर हो उपक्रम आशिल्ल्याच्या हुस्क्याक घटसाण दिवपी प्रकार आशिल्ल्याचें मत खासदार फर्नांडीस हांणी उक्तायलें. 

राज्य वेंचणूक आयोगा कडल्यान मतदार वळेरेंत नांव कायम दवरपा खातीर वळख सिद्ध करपी कागदपत्रां सयत हाजीर रावपा विशीं खासदार कॅ. फर्नांडीस हांकां नोटीस धाडल्या. राज्य वेंचणूक आयोगान 2024 चे लोकसभा वेंचणुके मजगतीं, दरेका उमेदवाराचें नांव मंजूर करचे पयलीं सगल्या कागदपत्रांचें व्हॅरिफिकेशन करीत प्रतिज्ञापत्रूय घेतलां. हाचे उपरांतूय लोकसभा वेंचणुको दोन वर्सां आदीं लडयिल्ल्या आनी सध्याच्या खासदारांक वेंचणूक आयोगा कडल्यान कागदपत्रांचें व्हॅरिफिकेशन आनी वळख धाडपा खातीर नोटीस दिल्ल्यान सोशल मिडिया वरवीं विवीध प्रतिक्रिया येवपाक लागल्यात. तशेंच हें सगलें विरोधी पक्षांच्या फुडार्‍यांक, कार्यकर्त्यांक आनी सरकार विरोधांतल्या मनशांचो लोकशायेन दिल्ल्या हक्कांचेर वेंर हाडपाचो यत्न केल्ल्याचो आरोप परतून जावपाक लागला. 

हाचेर खासदार कॅ. फर्नांडीस हांणी सांगलें, सर्गेस्त प्रधानमंत्री राजीव गांधी हांच्या यत्नांक लागून 18 वर्सां वयले तरणाटे मतदानाचो हक्क वापरपा खातीर पात्र जाले उपरांत 1989 सावन मतदान करतात. भारतीय नौदळांतल्या 26 वर्सांचे सेवे मजगतीं लोकसभा, विधानसभा, पंचायत वा जिल्हो पंचायत वेंचणुकां खातीर मतदान करपाक लश्करी नियुक्तीच्या पयसुल्ल्या सुवातां वयल्यान गोंयांत खूबशे फावटीं  प्रवास केला. मतदार पुनरिक्षण कार्यावळींत एका खासदाराक अशे तरेन कागदपत्रांचे छाननीक मुखार वच्चें पडटा, जाल्यार सामान्य मनशाची अवस्था कितें आसतली, हाची कल्पनाच केल्ली बरी, अशेंय खासदार फर्नांडीस हांणी म्हणलें. विरोधी पक्ष आनी स्वयंसेवी संस्था, नागरिकांनी वेंचणूक आयोगा वरवीं वैध मतदारांची नांवां काडपा खातीर आनी तांकां  मतदानाचे लोकशाय प्रक्रियेत भाग घेवपा पसून आडावपा खातीर एसआयआर प्रक्रिया चालयिल्ले खातीर हुस्को उक्तायिल्लो. त्या दुबावाक घटसाण दिवपी हो प्रकार, अशें फर्नांडीस हांणी सांगलें.