भांगरभूंय | प्रतिनिधी
नवी दिल्ली : लोकसभा आनी राज्यसभेच्या आदल्या आनी आतांच्या खासदारांचें वेतन आनी भत्त्यांत वट्ट २४ टक्क्यांची वाड केली. सोमारा केंद्र सरकारान हे विशींची अधिसुचवणी जारी केली. विशेश म्हणल्यार आदल्या प्रभावान, १ एप्रील २०२३ सावन ही वाड दितले.
खर्च, म्हारगाय निर्देशकांच्या आदारार केल्ले हे वेतनवाढीक लागून संसद वांगड्यांक दर महयन्याक एक लाखां परस १ लाख २४ हजार रुपया वेतन मेळटलें. सदचो भत्तोय दोन हजार रुपयां वेल्यान अडेज हजार रुपया आनी आदले खासदारांचें निवृत्ती वेतन दर म्हयन्याक २५ हजारां परस ३१ हजार रुपया केलां. पांच वर्सां परस चड काळ संसदेचे वांगडी म्हणून राविल्ल्या आदल्या खासदारांक ताचे उपरांतचे सेवे खातीर दरेकी वर्सा खातीर अतिरिक्त निवृत्तीवेतन दर म्हयन्याक २ हजारां वेल्यान २ हजार ५०० रुपया केलां. ह्यान पयलीं एप्रील २०१८त खासदारां खातीर वेतन आनी भत्तोवाड केल्ली.
भत्त्यांतूय वाड?
खासदारांक मतदार संघांतल्या खर्चा खातीर दर म्हयन्याक ७० हजार, कार्यालयीन भत्तो ६० हजार तशेंच, संसदेच्या अधिवेशनाच्या काळांत सदचो भत्तो २ हजार रुपया दिता. ह्या भत्त्यांतूय वाड करतले. खासदारांक दिल्लींत सरकारी घर दितात. ५० हजार युनीट वीज आनी ४ हजार लिटर उदक फुकट दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
