भांगरभूंय | प्रतिनिधी
6 मार्चाक राज्याचो अर्थसंकल्प : 3 दिसां जाग्यार 2 दिसूच जातली चर्चा
पणजी : मुख्यमंत्री डॉ. प्रमोद सावंत हे अधिवेशनाच्या पयल्याच दिसा 6 मार्चाक 2026 – 27 वर्सा खातीरचो अर्थसंकल्प सभाघरांत सादर करतले. शुक्रारा खासगी दीस आशिल्ल्यान विरोधी आमदारांनी 6 मार्चाक अर्थसंकल्पाक हरकत घेतली. बरो म्हूर्त आशिल्ल्यान 6 मार्चाक अर्थसंकल्प मांडपाचो निर्णय मुख्यमंत्र्यांनी घेतला. अर्थसंकल्पाचेर 9 आनी 10 मार्चाक चर्चा जातली. अधिवेशनाच्या निमणे दिसा 27 मार्चाक विनियोग विधेयक सादर जातलें, अशी म्हायती सभापती गणेश गांवकार हांणी कामकाज सल्लागार समितीचे बसके उपरांत दिली.
विधानभवनांत आयज अर्थसंकल्पी अधिवेशनाचें कामकाज थारावपा खातीर सभापती गणेश गांवकार हांचे फुडारपणा खाला बसका जाली. हे बसकेक मुख्यमंत्री डॉ. प्रमोद सावंत, विरोधी पक्ष फुडारी युरी आलेमाव, आमदार विजय सरदेसाय आनी हेर वांगडी हाजीर आशिल्ले.
अर्थसंकल्पाचेर दर खेपो तीन दिस चर्चा जाता. हे खेपो दोनूच दिस जातली. आमदारांक उणो वेळ मेळटलो. तशेंच अर्थसंकल्प शुक्रारा सादर जावपाक लागून खासगी कामकाजाचो एक दीस उणो जातलो. अर्थसंकल्प हेर दिसा मांडपाची मागणी हांवें केल्ली, अशें आमदार विजय सरदेसाय हांणी बसके उपरांत सांगलें. अधिवेशनांत आतां मेरेन 563 तारांकित आनी 1832 आतारांकित प्रस्न आयल्या.
अर्थसंकल्पाचेर चर्चा जाले उपरांत 11 मार्च सावन खात्यांच्या मागण्यांचेर चर्चा सुरू जातली. 11 दीस ही चर्चा जातली. अधिवेशनाच्या निमणे दिसा मुख्यमंत्री विनियोग विधेयक सादर करतले. हे भायर पुरवणी मागण्यांचें (तिसरी बॅच) विधेयक सादर जातलें. अधिवेशनांत 15 खासगी प्रस्ताव चर्चेक घेतले. आमदारां कडल्यान जीं विधेयकां आयल्यां तीं संबंधीत खात्यांक धाडून दिल्या. खात्यांकडल्यान मान्यताय मेळ्ळी जाल्यार ती अधिवेशनांत चर्चेक येतली, अशें सभापती गणेश गांवकार हांणी सांगलें.
वेंचणूक लागी आशिल्ल्यान अधिवेशनांत दरेकी आमदार बरी कामगिरी करपाचो येत्न करतलो. सभाघराची प्रतिश्टा राखून ताणे बरी कामगिरी करपाचे येत्न करचे, असो उलो हांवें बसकेत मारला : गणेश गांवकार, सभापती
आमदारांच्या विशेशाधिकारांची जतनाय करपाची मागणी
कामकाज सल्लागार समितीच्या बसकेक उपोशणाक बशिल्ले आमदार विरेश बोरकार हाजीर आशिल्ले. नगरनियोजन खात्यांतल्यान पुलिसांनी भायर काडपाचो विशय तांणी बसकेंत मांडलो. हेर विरोधी आमदारांनी लेगीत हे वेळार पुलिसांचें निलंबन करपाची मागणी केली. आमदारांच्या विशेशाधिकारांची जतनाय करपाची मागणी जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
