भांगरभूंय | प्रतिनिधी
चर्चे वेळार आमदारांनी मांडली कागाळ
पणजी: खासगी कंपनींनी थळाव्या लोकांक नोकरेंत प्राधान्य मेळपाक जाय. खुबश्यो कंपनीं अजून भायल्या कामगारांक कामाक घेतात अशी कागाळ आमदारांनी चर्चे वेळार मांडली. येणावळ, कोयर वेवस्थापन, कामगार खात्याच्या मागण्यांचेर सभाघरांत चर्चा जाली.
लयराय जात्रे वेळार जाल्ले खेटाखेटीक उत्तर गोंय जिल्होधिकाऱ्या सयत प्रशासन जापसालदार आसा. नियोजन आनी समन्वय सारकें नाशिल्ल्यान खेटाखेटीत भाविकांक मरण आयलें, असो आरोप विरोधी पक्ष फुडारी युरी आलेमांव हांणी केलो. गोंयच्या दर्यादेगांचेर आवाजाचें प्रदुशण सुरूच आसा. आवाजाच्या प्रदुशणाचेर नियंत्रण दवरपाक अपेस आयलां. मोकासो आनी अल्वारा जमनी विशीं अगरवाल समितीन दिल्लो अहवाल सरकार कित्याक उक्तो करिना? पारदर्शक वेव्हाराच्या हेतान सुरू केल्ल्या भूनक्षा पोर्टलाक लागून बरेच गैरवेव्हार जावपाक लागल्यात असोय आरोप युरी आलेमांव हांणी केलो.
भूनक्षा वॅबसायटी विशीं घुस्पागोंदळ सुरू आसा, अशी कागाळ आपाचे आमदार क्रुझ सिल्वा हांणी केली. जात्रा तशेंच महोत्सवांत गर्देच्या वेवस्थापना खातीर आराखडो तयार करपाची मागणी सिल्वा हांणी केली.
वास्कोंत पोरण्यो आनी जीर्ण इमारती घातक थारपाची शक्यताय आसा. ह्या इमारतींचेर कारवाय करपाची मागणी आमदार कृष्णा साळकार हांणी केली. कोयर एकठांय करपा खातीर आनीक 10 रिक्षांची गरज आसा अशें तांणी सांगलें. दक्षीण गोंय जिल्होधिकारी कार्यालयांत लांच घेवन सनद, म्युटेशन सेवा बेगीन दिवपाचे गैरवेव्हार सुरू आसात. सनद तशेंच म्युटेशनाची प्रक्रिया पुराय जावपा खातीर थारावीक काळ (टायम बावंड) निश्चीत करपाची मागणी वेंझी व्हिएगश हांणी केली. क्रिस्तांव मेस्तांक ओबीसी दर्जो दिवपाची मागणी पोरणी आसा. ही मागणी पुराय करची अशें वेंझी व्हिएगश हांणी सांगलें.
गोंयच्या काजूक जीआय टॅग दिवपाक मान्यताय दिल्ली आसली तरी अजून जीआय टॅग मेळूंक ना. जाता तितले बेगीन काजूक जीआय टॅग दिवपा सयत गोंयच्या काजूक देश, विदेशांत योग्य दर मेळपा खातीर तजवीज करपाक जाय अशी मागणी आमदार देविया राणे हांणी केली. अल्वारा जमनींत रावपी लोकांक घरां बांदपा खातीर रीण मेळना. अल्वारा जमनीचो प्रस्न बेगीन सुटावो जावपाची गरज आसा अशें राणे हांणी सांगलें
गोंयांत बेरोजगारीचें प्रमाण 8.5 टक्के आसा. खासगी कंपनींनी कितले गोंयकार कामाक आसात ताची म्हायती सरकारा कडेन ना. खासगी कंपनींनी गोंयकारांक नोकरी मेळपा खातीर धोरण तयार करचें अशी मागणी आरजीचे आमदार विरेश बोरकार हांणी केली. गोंयांत दोंगर कापणी सयत बेकायदाे जमीन हडप करपाचे प्रकार सुरूच आसात. हातूंत सरकारी अधिकारी वांटेकार आसात असो आरोप आमदार अॅड. कार्लोस फेरेरा हांणी केलो. बेकायदाे दोंगर कापणीचेर नियंत्रण दवरपा खातीर म्हाल पांवड्यार घोळटे पंगड स्थापन करपाक जाय. म्युटेशनाची प्रक्रिया पारदर्शी करपा खातीर आधार कार्ड सक्तीचें करपाची गरज आसा अशें कार्लोस फेरेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
