भांगरभूंय | प्रतिनिधी
नवी दिल्ली, खबरां संस्था: सध्या गणेश उत्सव नेटान सुरू आसा. उपरांत पितृ पंधरवडा लागतले, हो उत्सव सोंपलो काय नवरात्रां आनी उपरांत दिवाळी आसतली. ह्या परबांच्या दिसांनी आमकां विवीध खाणां तयार करपाक भरपूर तेल जाय पडटा. नेमकें ह्या सणांच्या दिसांनी हें खावपाचें तेल म्हारग जावपाचें आसा. ताका लागून सामान्य लोकांचें बजेट मात्शें हालतलें.
परबांच्या दिसांनी खावपाचें तेल म्हारग
नवरात्रांनी णव दिसांचे उपास आसता. दिवाळेक फराळ तयार करतात. ह्या सगळ्यांनी खावपाचें तेल वापरतात. नेमकें ह्या परबांच्या दिसांनी गिरायकांच्या बोल्साक कांतर लागपाची आसा हें निश्चीत.
पीटीआयचे बातमे प्रमाण, सरकारान क्रूड, रिफायन्ड सनफ्लॉवर ऑयल आनी हेर खावपाच्या तेलांचेर कस्टम ड्युटी वाडोवपाचे निर्णय घेतला. आयात शुल्कांत २० टक्के वाड केल्ल्यान खावपाचें तेल म्हारग जातलें.
अर्थ मंत्रालयान एक अधिसुचवणी काडल्या ते प्रमाण, क्रुड आनी रिफायन्ड पाम तेल, सोयाबीन तेल आनी सनफ्लॉवर सीड तेल हांचेर बेसीक कस्टम ड्युटी वाडयल्या. क्रुड पाम ऑयल, क्रूड सोयाबीन तेल आनी क्रुड सनफ्लॉवर सीड ऑयलीचेर बेसीक कस्टम ड्युटीचें दर आतां मेरेन शुन्य आशिल्लें. म्हळ्यार ह्या तेलाचेर आयात शुल्क लागनाशिल्लें. आता हेंच आयात शुल्क वाडून २० टक्के केलां. जाल्यार रिफायन्ड सनफ्लॉवर सीड ऑयल, रिफायन्ड पाम ऑयल, रिफायन्ड सोयाबीन तेलांचेर बेसीक ड्युटीचें दर वाडोवन ३२.५ टक्के केलां. हो बदल सप्टेंबर म्हयन्यांत जातलो. ताका लागून खावपाचें तेल म्हारग जातलें, हें निश्चीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
