भांगरभूंय | प्रतिनिधी
दुस्वासी प्रवृत्ती समाजाच्या सगल्या मळांचेर आसा. कोण उक्तेपणी द्वेश करतात, तर थोडे मनांतल्या मनांत. तुमचें बरें जाल्लें ताच्यान पळोवं नज. ते गोड वागतात. तोंडांतल्यान म्होंवूच रकता तांच्या, पूण केन्ना ते तुमचे फाटींत सुरो तोंपतात, तें त्या सुऱ्याक पसून कळना. विस्वासघातकी मनशाक धर्म, प्रांत, शीम लागना. फक्त मनीसूच न्हय तर राज्यां, देशूय घातकी आसतात. पाकिस्तान ही ताची बरी देख. 14 आॅगस्ट 1947 दिसा पाकिस्तान निर्माण जालो. आमच्याच देशाचो हो कुडको. पूण जल्माक येत सावन तो आमकां त्रास दित आयला. तीन झुजां जालीं, तातूंत तो हारलो, तरी जित्याची खोड मेले बगर वचना म्हणटात, ते भशेन तो कितें ना कितें कुरापती काडीत आसता. उणी लोकसंख्या आसून पसून 75 वर्सांच्या काळांत तो अर्थीक, समाजीक, राजकी मळाचेर आयज मेरेन दुयेंत उरला. ताका लागून तो भारताचेर जळटा. धर्म एके धर्म केल्ल्यान आनी हिंसक मनोवृत्तीक वेंगायिल्ल्यान ताची ही आवतिकाय जाल्या. धर्मा वांगडाच शिक्षणा सारक्या हेर गजालींकूय वेंग मारिल्ली जाल्यार आयज तो खंयचे खंय पावतलो आसलो.
पाकिस्तान भारताक अस्थीर, दुबळो करपाक सोदता. ते खातीर पयल्या दिसा सावन ताचे यत्न चालूच आसात. बंडखोर, अतिरेक्यांचो वापर करून तांणी जम्मू- काश्मीरांत आतंकवाद पातळायला. हे घटकेक पसून थंय सप्तकाक पांच तरी जवान जखमी वा शहीद जातात. ह्या हिंसाचार- घुसखोरी पसून लोक, मालमत्ता हांची राखण करपाक काश्मीराचेर आमच्या सरकारांनी कितलो पयसो खर्च केला, ताचें कोंत आनी हिशोब ना. 5 आॅगस्ट 2019 दिसा 370 कलम स्थगीत दवरून काश्मीर केंद्रशासीत प्रदेश केलो. तेन्ना सावन नोव्हेंबर 21 मेरेन (28 म्हयने) णव हजार कोटी रुपया आमी सुरक्षेचेर खर्च केल्यात. आतां तुमीच हिशोब करात, 15 आॅगस्ट 1947 ते 15 मे 2023 मेरेन कितलो दुडू मोडला आसतलो तो! हाचे वयल्यान पाकिस्तानान आमचें कितलें लुकसाण केलां तें कळटा. मनीस मेल्यात, ताचें मोल करूं नज!!
राॅ, आयएसआय, केजीबी, मोसाद, एमआय 6, एसव्हीआर, सीआयए अश्यो सगल्याच देशांच्यो गुप्तचर संघटना आसात. तांचें काम हेरगिरी करपाचें. पूण, ताचे भायर कांय लोकूय हेरगिरी करतात. म्हणजे आपल्या देशाची मोलादीक म्हायती दुस्मान देशाक दितात. ताचो दुस्मानांक फायदो जावं येता. आदल्या तेंपार राजाक, सेनापतीक मारपाक विशकन्यांचो वापर करताले. आतां ताका हनी ट्रॅप वा मोहजाल म्हणटात. डीआयडीओचे (संरक्षण संशोधन आनी विकास संस्था) संचालक डाॅ. प्रदीप कुरुलकर हाका एटीएसान अटक केल्या. ताका पाकिस्तानांतल्यान कांय ईमेल आयल्यात आनी ताणे भारताचे सुरक्षेक बादा येवं येता, अशी म्हायती धाडल्या, असो दुबाव आसा. आतां काल बंगळुरूंतलो हवाई दळाचो कर्मचारी निखील शेंडे (नागपूर) हाका ताब्यांत घेतला. तो वरिश्ठ अधिकारी अशेंय कांय खबरां संस्थांचें मत. हवाई दळ ताची चवकशी करता. ह्या दोगांय कडेन एक पाकिस्तानी बायल चॅट करताली. तांकां आपले नाका जाल्ले व्हिडियो दाखयताली. ताच्या बदल्यांत तांणी ही म्हायती दिली, अशें मुळाव्या तपासांत कळ्ळां. व्हिडिओ आनी व्हाट्सअॅपा वरवीं हीं देशद्रोही कृत्यां जाल्यांत. कुरुलकर आनी शेंडें हांची एकमेकां कडेन वळख आशिल्ली काय ना, तें तपासा उपरांत कळटलेंच. ह्या दोगांयकूय पाकिस्तानी गुप्तहेरांनी जाळ्यांत फारायल्यात. तपास यंत्रणांनी हाची बारीकसाणेन चवकशी करून पुराय सत्य बेगीन उक्ताडार हाडचें. हे दोगूच आसात, काय हे सांखळेंत आनीक कोण आसात, तें देशाक कळूंदी.
विरोधी पक्षांनी हे दोगूय विशिश्ट विचारसरणीचे
अशें म्हणून ह्या प्रकाराक वेगळें मोडण दिवपाचो
यत्न केला. ताचो तपासाचेर परिणाम जावचो न्हय. खाल्ल्या पानाचेर हळशीक करपी ह्या घरभेदींक दोशी आसल्यार कडक ख्यास्त मेळपाक जाय.
अपुरबुद्द तरणाटे सोरो, चिकन, तरणाटी चली, पयशांचे आशेन वा धर्मा खातीर कितेंय (देश विरोधी काम पसून) करपाक तयार आसतात. हे दोगूय विचारी, वरिश्ठ पदांचेर काम केल्ले. तांकां ही दुर्बुद्दी कशी सुचली, तें कळना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
