भांगरभूंय | प्रतिनिधी
मुख्यमंत्र्यांची भेट घेतले उपरांत मंत्री रोहन खंवटे हांचें आस्वासन
पणजीः खाप्रेश्वर देवस्थान हें शिमे भितरच आसतलें. थळाव्यांनी सुवात सोदून दिवची आनी प्रसाद घेवचो. मुख्यमंत्र्यांनी दिल्ल्या आश्वासना प्रमाण नवे देवूळ थंय बांदतले अशें पर्यटन मंत्री रोहन खंवटे हांणी सांगलें.
थळावे आनी देवस्थान समिती सयत खंवटे हांणी मुख्यमंत्र्यांची आल्तिनो वेल्या बंगल्याचेर भेट घेतली. हें देवूळ गांवचे शिमे भितरच बांदचें अशी मागणी तांणी मुख्यमंत्र्या कडेन केली.
उपरांत ह्या विशयाचेर उलयतना रोहन खंवटे हांणी सांगलें, पुराय गजालीची म्हायती नाशिल्ल्या कारणान त्या दिसा गैरसमज जावन राजकी वाद निर्माण जालो.
2019 त खाप्रेश्वर देवस्थानाचे अध्यक्ष कार्तीक कुडणेंकार हांणी संमती पत्राचेर सय केल्ली आनी संमती पत्र सर्वोच्च न्यायालयांत दाखल केलां. तातूंत होली फॅमिली इगर्जेचो आस्पाव आशिल्लो जांणी आपले दुरीग मोडलें तशेंच 300 वर्सां पयलींचे कपेल दुसरे वटेन व्हेलें. हातूंत म्हजो कसलोच वांटो नाशिल्लो. फक्त भौशीक बांदकाम खातें आनी थळावे हांचे भितरच निर्णय जातालो, अशें खंवटे हांणी सांगलें.
जेन्ना फ्लायओव्हराचें खांब येवपाक सुरवात जाले तेन्ना कोणेच बोवाळ केलो ना. कपेलाचें दुरीग मोडलें, कपेल दुसरी कडेन व्हेलें ते मेरेन ते ओग्गी आशिल्ले. पूण गजाल जेन्ना खाप्रेश्वर देवळा कडेन पावली तेन्ना तांणी बोवाळ मारपाक सुरवात केली. हाचोच अर्थ तांकां हातूंत राजकारण करपाक जाय. हे बांदकाम सुरू जावचे पयलीं तांकां फ्लायओव्हराची रुपरेखा दाखयल्या आनी ह्याच बोवाळ मारपी लोकांनी आपली संमती दिल्या, अशें रोहन खंवटे हांणी सांगलें.
देवाचें थळ थारावपाक आमी कोण न्हय. हांवें थळाव्यांक विनवणी केल्या, तुमी तुमच्या जाण्ट्यांक विचारून देवळांत प्रसाद घेयात आनी ताचें थळ थारायात. उपरांत भौशीक बांदकाम खात्याक घेवन ते सुवातेर पयलीं परस बरें देवूळ जशे लोकांक जाय तशें देवूळ रोखडेंच बांदून दितां अशें आस्वासन मुख्यमंत्रांनी दिलां. तशें जाल्यार फुडले पिळगेक बरो संदेश वतलो आनी हे राजकारण खंय तरी बंद जातलें, अशें रोहन खंवटे हांणी म्हणलें.
पयली आशिल्ले सुवातेर देवूळ बांदप काय ना हो निर्णय थळाव्यांनी घेवचो. देव खाप्रेश्वर शीम सोडून वच्चो ना आनी तो थारायता ते सुवातेर ताका स्थापना करपाची आमची जापसालदारकी आसतली. तशेंच जे कपेल फ्लायओव्हराच्या कामांक लागून मोडलां ते आमी आतां चडावार बांदपाक सुरवात केल्या, अशें खंवटे हांणी सांगलें.
आमकां उदरगत करपाक विरोध ना, पूण खाप्रेश्वराचें देवूळ आसा थंयसरच बांदचें म्हूण आमी सुकूर पंचायती कडेन मागणी केल्ली. दोन दिसां भितर आमदार रोहन खंवटे कडेन उलोवन मुख्यमंत्र्या कडेन बसका घेवपाचें आस्वासन दिल्लें. पंचायतीन आयज अर्ज मुख्यमंत्र्या मुखार मांडला आनी मुख्यमंत्र्यांनी सांगलां, तुमच्यो भावना दुखोवच्यो नात. तुमका जाय तशें जातलें. बांदकाम कामांत आडखळ येवची न्हय तशेंच अपघात जावचे न्हय ह्या कारणां खातीर तांणी तें देवूळ दुसरी कडेन व्हेलें, अशें थळावे सर्वेक्ष पेडणेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
