भांगरभूंय | प्रतिनिधी
आम आदमी पक्षाचे संयोजक अमित पालेकार हांची घोशणा
पणजीः सरकारान खाप्रेश्वर देवाची मुर्ती कसलोच धर्मीक विधी करिनासतना दुसरे कडेन हालयल्या. तिचें रातयां अपहरण केलां. मुर्ती दुसरे कडेन व्हरचे पयलीं देवूळ बांदून तयार करपाक जाय आसलें. मात देवूळ बांदपाचें आश्वासन दिवनय जर सरकार ती मुर्ती व्हरता जाल्यार सरकारा कडेन पयशे नासतले. देखून पुराय गोंयांत भिक्षूक जावन खाप्रेश्वराच्या देवळा खातीर आमी निधी एकठांय करतले, अशें आम आदमी पक्षाचे संयोजक अमित पालेकार हांणी सांगलें.
पक्षान आपल्या कार्यालयांत पत्रकार परिशद घेतली. ह्या वेळार पालेकार हांचे सयत चेतन कामत आनी हेर फुडारी हजर आशिल्ले. ह्या वेळार उलयतना पालेकार हे मदींच भावूक जाले. म्हाका पुलिसांनी १०० फावटीं आपयलो. पूण हांव भियेवंक ना. मात आयज सकाळीं उठले उपरांत ही घडणूक आयकली आनी म्हाका लाचार आशिल्ले सारको अणभव आयलो अशें तांणी म्हणलें.
मुख्यमंत्र्यान खाप्रेश्वर देवाक बरे देवूळ बांदून दुसरे कडेन व्हरपाचें आस्वासन दिल्लें. ताचेर विस्वास दवरून लोक न्हिदपाक गेले तेन्ना सरकारी यंत्रणा मध्यानरातीं मुर्ती घेवन गेली. २०१९ वर्सा आदेश आयिल्लो ताचेर देवूळ मोडपाचो वा मुर्ती काडपा विशींचो कसलोच उल्लेख ना. ह्या जाग्यार सरकार कसलो प्रकल्प बी हाडपाक सोदता जाल्यार तें स्पश्ट करचें, अशी मागणी पालेकार हांणी केली.
ते कित्याक येवंक ना?
मान दिवन आनी धर्मीक विधी सयत मुर्ती दुसरे कडेन व्हरपाची आमी मागणी केल्ली. मात देवाक दवरिल्लो चौथरो कापून आनी मोडून ताचें अपहरण केलें. आरएसएस, बजरंग दल, स्वामी तशेंच शिवरात्रेक आनी राम नमींक ट्रान्स म्युजीक लावन, भगवे घालून भोंवपी ह्या देवळाच्या रक्षणा खातीर कित्याक येवंक ना, असो प्रस्न पालेकार हांणी केलो.
निधी खातीर मोहीम
सरकारान जितले पयशे चार्टर विमानांत वचपाक खर्च केल्यात, तितले एक बारीकशें देवूळ बांदपा खातीर खर्च करपाक शकतालें. मात उपरांत देवूळ बांदपाचें आस्वासन दिवन तें लोक नासतना मुर्ती काडून व्हरता? आमकां सरकाराच्या पयशांची गरज ना. आमी आमच्या पयशांनी देवूळ बांदतले, अशें पालेकार हांणी सांगलें.
आमचो देव तांणी खंय व्हेला तें खबर ना. मात ह्या देवळा खातीर हांव भिक्षुक म्हूण गोंयभर भोंवपाची एक मोहीम सुरू करतां. पेडणें ते काणकोण मेरेन भिक्षूक जावन पयशे एकठांय करतले. हें देवूळ १० जाणांच्या पयशांनी बांदपाक जाय. सरकाराच्या पयशांनी बांदिल्लें आमकां नाकां, अशी भुमिका पालेकार हांणी ह्या वेळार जाहीर केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
