भांगरभूंय | प्रतिनिधी
पणजी : खानापूर म्हालाच्या इदलहोंडांत धक्को दिवप घडणूक मुखार आयली. एक तरणाटो लग्न जाल्ले बायलेचो फाटलाव करीत तिचीं फकांडां करतालो.
बायलेन हे विशीं आपल्या घोवाक सांगलें. मजगतीं तीं दोगांय भट्टीचेर काम करतना ह्या तरणाट्यान आपल्या कांय इश्टां वांगडा येवन बायलेच्या घोवा वांगडा वाद घालो. उपरांत ताचें रुपांतर झगड्यांत जालें. तरणाट्यान ते बायलेच्या घोवाचेर हल्लो केलो. मजगतीं, थंयच बायलेचो भावूय काम करतालो. तो मदीं पडून झगडें सोडोवपाचो यत्न केलो. तेन्ना त्या तरणाट्यान ताच्या दोळ्यांत मिरसांगेची पावडर घालून पळ काडलो.
मेळिल्ले म्हायती प्रमाण, काजल पुजारी (मूळ हुक्केरी) ही बायल कांय काळा सावन इदलहोंड हांगच्या वीटभट्टीचेर आपल्या घोवा सयत मजुरी करता. तिच्याच गांवांतल्या लगमप्पा नांवाच्या लग्न जाल्ल्या दादल्यान म्हयन्यां सावन बरेच मानसीक त्रास दिले. घोवाक सोड, तुका जाय तें दितां अशें म्हणीत तिच्या फाटल्यान लागलो. तो येता वता काजलाक त्रास करतालो. तिचे कडेन वायट नदरेन पळयतालो.
शेनवारा दनपरां, काजल आनी तिचो घोव मल्लप्पा पुजारी कामार आसतना, लगमप्पा आपल्या सात वांगड्यां सयत थंय पावलो आनी अचकीत हल्लो केलो. हल्लेकारां मदीं मल्लप्पा पुजारी, मल्लेश पुजारी, लगमेश पुजारी, सिद्दव्वा पुजारी, कारेव्वा पुजारी, लक्कव्वा पुजारी आनी आनीक एक सिद्दव्वा पुजारी हांचो आसपाव आसा. हल्ल्या मजगतीं काजलचो भाव मदीं आयलो. ताच्या दोळ्यांत ताणी मिरसांगे पिठो घालो आनी पळ काडलो. भावाच्या दोळ्यांक गंभीर दुखापत जाली. सध्या ताचेर वैजकी उपचार सुरू आसात. हे घडणुकेची नोंद खानापूर पुलीस स्टेशनांत केल्या. आरोपीं आड गुन्यांव दाखल करून फुडलो तपास सुरू जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
