भांगरभूंय | प्रतिनिधी
बेळगांव ः खानापूर तालुक्यांतल्या तळेवाडी- गोल्याळी रस्त्यार काल शुक्रारा 6 तारखेर रातच्या सुमार 8 वरांचेर वाग भोंवतना स्कुटरी वेल्यान वचपी दोगांक दिसलो. तांणी भियेवन थंयच स्कुटर थांबयली आनी वाग वचपाची वाट पळयली, पूण वाग मात्सो फुडें गेलो आनी परत तसोच फाटीं परतलो आनी हल्लो करपाक स्कुटरी वटेन येवंक लागलो. ते पळोवन स्कुटर चलोवप्यान रोखडीच स्कुटर घुंवडायली आनी थंय सावन पळ काडलो.
तोराळीचो जेसीबी धनी आकाश पाटील आनी ताचो जेसीबीचो ड्रायव्हर प्रदीप चव्हाण हें दोगूय आपलें काम पुराय करून स्कुटरीवेल्यान तोराळी गांवांत येताले तेन्ना ही घडणूक घडली.
लोकांनी जतनाय घेवपाची गरज आसा. रानां खात्यान लक्ष घालून उल्लेख केल्ल्या वागाचो बंदोबस्त करपाची मागणी ह्या वाठारांतल्या नागरिकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
