भांगरभूंय | प्रतिनिधी
भांगरभूंय । प्रतिनिधी
बेळगांवः खानापूर तालुक्यांतल्या दक्षीण वाठारांतल्या गोदोळ्ळी, गोदगेरी, बाळगुंद गांवातल्या शेतांनी बुधवारा सकाळीं 6 वरांचेर 15 हतयांचो कळप आयलो. ताणी ऊसकाणे आनी हेर पिकाची नासाडी केली. अचकीत हती आयिल्ल्यान शेतकारां मदीं भिरांत पातळ्ळी. निमाणे तांणी एकठांय जावन तांका आमडून घातलें. दांडेलीच्या रानांतल्यान हो कळप आयलो अशें रानां अधिकाऱ्यांनी सांगलें.
शेंतात 15 हती आयले उपरांत गांवांतल्या कुत्र्यांनी भोकपाक सुरवात केली. गांवांतल्या लोकांनी तांका आमडून घालपा खातीर डबे वाजोवन आवाज केलो. शेतां भोवतणी घातिल्ल्या लायटी करंटाच्यो वायरी तोडून हे हती शेंतांत आयले अशें शेतकारांनी सांगलें. फाटल्या कांय दिसा सावन हती दिसतात मात बुधवारा तांचो आंकडो सगल्यांत चड आशिल्लो अशें एका शेतकारान सांगलें.
हतयानी ऊसकाणे आनी हेर पिकाची नासाडी केल्ल्यान शेतकारांनी रानां खात्या कडेन लुकसाण भरपाय दिवपाची मागणी केल्या. कर्नाटकाच्या राना खात्याचे कर्मचारी आनी अधिकाऱ्यांनी ह्या हतयांक परत रानांत धांवडायलें , अशें उपवनपाल पी हरिश बानू हाणे पत्रकारांक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
