भांगरभूंय | प्रतिनिधी
मंत्री गावडें हांच्या आरोपाचेर स्पश्ट प्रतिक्रियेक रोहन खंवटेंचो न्हयकार
पणजी : देवाण – घेवाणी उपरांतूच आदिवासी कल्याण खात्यांतल्यो फायली क्लिअर जाल्ल्याच्या कला, संस्कृती मंत्री गोविंद गावडे हांच्या गंभीर आरोपा उपरांत परत सरकारांतल्या भ्रश्टाचाराची चर्चा सुरू जाल्या. सभापती रमेश तवडकार तशेंच पर्यटन मंत्री रोहन खंवटे हांणी हाचेर सरळ प्रतिक्रीया दिवंक ना. आदिवासी कल्याण खात्यांतल्या कामा विशीं गोविंद गावडे हांणी मुख्यमंत्र्यां कडेन चर्चा करपाक जाय आशिल्ली. ते मंत्री आशिल्ल्यान हांव उलोवपाक शकना, अशें सभापती रमेश तवडकार हांणी म्हणलें. तर आरोप म्हजे कडेन संबंदीत नाशिल्ल्यान हांव कांयच उलोवपाक शकना, अशी प्रतिक्रीया पर्यटन मंत्री रोहन खंवटे हांणी उक्तायली.
आयतारा फोंडेंच्या प्रेरणा दिसाचे कार्यावळींत आदिवासी कल्याण खात्याचें प्रशासन डळमळ्ळां. पणजेचें श्रमशक्ती भवना सकयल कंत्राटदारां कडल्यान कितेंय घेवनूच तांच्यो फायली वयर दितात, अशें वक्तव्य मंत्री गोविंद गावडे हांणी केल्लें. आदिवासी कल्याण खातें मुख्यमंत्री डॉ. सावंत हांचे कडेन आसा. मुख्यमंत्री ते कार्यावळीक हजर नाशिल्ले.
हांव जेन्ना आदिवासी कल्याण खात्याचो मंत्री जाता तेन्ना रचणूक तयार जावन येवजण्यो चालीक लागिल्ल्यो. गोविंद गावडे मंत्री आसतना तांणी खात्याच्या कामांत खंयची भर घाली, हाची म्हाका म्हायती ना, अशें सभापती तवडकार हांणी म्हणलें.
पर्यटनमंत्री खंवटे हांकां आरोपा विशीं विचारलें तेन्ना, तांणीय थेट प्रतिक्रीया दिवपाक न्हयकार दिलो. हांव सरकारांत जरी आसलों तरी केल्ल्या आरोपांचो म्हजे कडेन कसलोच संबंद ना. जांणी आरोप केल्यात, तेय सरकारांतूच आसात. तांकांच हे विशींची चड म्हायती आसतली, अशी प्रतिक्रीया श्री. खंवटे हांणी उक्तायली.
विरोधकांनी मात्र सत्य परिस्थिती मांडिल्ल्याच्या स्वरुपाच्यो प्रतिक्रिया दिल्यात. इतलीं वर्सां जनते कडल्यान जो भ्रश्टाचाराचो आरोप जातालो तोच मंत्री गोविंद गावडे हांणी केला. आपल्या आरोपाचेर ते कायम रावतले काय पक्षाच्या चेंपणा उपरांत पांडुरंग मडकयकार हांचे प्रमाण यु टर्न घेवन फाटीं सरतले, होच खरो प्रस्न आसा, अशें कॉंग्रेसचे आमदार ऍड. कार्लोस फेरेरा हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
