भांगरभूंय | प्रतिनिधी
पर्वरे विद्या प्रबोधिनी म्हाविद्यालयांत मनयलो राजभाशा दीस
पणजीः राज्य म्हायती आयोगांतले रोजनामे, नोंदी राजभाशेंतल्यान बरोवंक सुरवात जाल्या. तशेंच वेगळ्यावेगळ्या खात्यांतल्यान अर्ज लेगीत कोंकणींतल्यान येवपाक लागल्यात. प्रशासकी पांवड्यार नोंदी, पत्रां राजभाशेंतल्यानूच बरोवंक जाय आनी ते खातीर राजभाशा संचालनालयान आनीक नेटान वावर करूंक जाय. तशेंच सरकारी राजपत्र कोंकणींतल्यान काडपाची जापसालदारकी आमची सगल्यांची आसा आनी ते खातीर सगल्या खात्यांनी नेटान वावर करूंक जाय अशें राज्य म्हायती आयुक्त ॲड. आत्मारामबर्वे हांणी सांगलें.
राजभाशा संचालनालयान पर्वरेच्या विद्या प्रबोधिनी म्हाविद्यालयाच्या जोड पालवान राजभाशा दीस मनयलो. ह्या वेळार मुखेल सोयरे ह्या नात्यान ॲड. आत्मारामबर्वे उलयताले. ही कार्यावळ काल (मंगळारा) विद्या प्रबोधिनी म्हाविद्यालयांत जाली.
जे भाशेक लागून आमी पोट भरतात आनी तेच भाशेचेर जर दुर्लक्ष करतात जाल्यार आमचेच भाशेचेर आमी अन्याय करतात. राजभाशा अंमलबजावणी जावंक आतां सावनूच नेटान वावर करूंक जाय, आनी आपले भाशेचो वापर चडांत चड करुया असो उलो ॲड. बर्वे हांणी मारलो. कोंकणी आनी मराठी ह्या दोनूय भाशां मदीं वाद जावंक जायना. दोनूय भाशा एकामेकांक पुरक आनी पोशक आसात अशेंय तांणी मुखार उलयतना सांगलें.
कोंकणी राजभाशा जाली म्हणून गोंयाक घटकराज्याचो दर्जो मेळ्ळो. कोंकणीक लागुनूच गोंयकारांक नोकरेच्यो संदी मेळटात. आतां प्रशासनांत लेगीत कोंकणीचो चडांत चड वापर जावंक जाय अशें प्राचार्य डॉ. भूषण भावे हांणी सांगलें. प्रशासनांत कोंकणीचो चडांत चड वापर जावचो म्हणून राजभाशा संचालनालय वावुरता. ते खातीर डॉ. भूषण भावे हांणी संचालनालयाची तोखणाय केली.
ह्या सुवाळ्या वेळार, राजभाशा संचालनालयाचे संचालक प्रशांत शिरोडकार हांणी प्रास्तावीक उलोवप केलें. राजभाशेची अंमलबजावणी करूंक कोंकणी प्रशिक्षण, देवनागरी टंकलेखन प्रशिक्षण आनी शब्दावली निर्मितीचें काम नेटान चालू आसा अशें तांणी सांगलें. हे कार्यावळीक, प्रबोधन शिक्षण संस्थेचे अध्यक्ष संजय वालावलकार, तशेंच वांगडी श्रीपाद उर्फ कांता पाटणेंकार, राजभाशा उपसंचालक अनील सावंत हाजीर आशिल्ले.
कार्यावळीचें मुखेल संयोजन राजभाशा उपसंचालक अनील सावंत हांणी केलें. सरकारी कर्मचार्यां खातीर घेतिल्ल्या कोंकणी प्रशिक्षणा उपरांत पुराभिलेख खातें, कुंकळ्ळी नगरपालिका, शार आनी उदरगत खातें अश्या विंगड विंगड खात्यांनी कोंकणींतल्यान पत्रवेव्हार जावपाक लागला आनी सरकारी खात्यांक जाय तितलो आदार दिवंक हें संचालनालय तयार आसा अशें अनील सावंत हांणी सांगलें.
म्हाविद्यालया वतीन कार्यावळीचें संयोजन आनी कार्यावळीचें सुत्रसंचालन सहाय्यक प्राध्यापक दर्शन कांदोळकार हांणी केलें. राजभाशा संचालनालया वतीन स्नेहा सबनीस आनी मानसी देवारी हांणी कार्यावळीचें सह-संयोजन सांबाळ्ळें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
