भांगरभूंय | प्रतिनिधी
पणजी: खाणांनी रंग वापरून तशेंच भेसळ करून गोंयकारांच्या भलायके कडेन कोणाकूच खेळपाक दिवचे नात. अशे प्रकार करपी आस्थापनांचेर अन्न आनी वखदां प्रशासना कडल्यान (एफडीए) धाड घालप सुरू आसा. फुडरांत हे विशींची खर कारवाय करतले अशें भलायकी मंत्री विश्वजीत राणे हांणी मंगळारा पत्रकारां कडेन उलयतना सांगलें.
फाटल्या कांय वर्सां सावन राज्यांतलीं कांय आस्थापनां खाणांनी व्हड प्रमाणांत भेसळ करीत आसात. अशा पदार्थांच्या सेवनाचो फटको राज्यांतल्या लोकांचे भलायकेक बसत आसा. ताका लागून अशा आस्थापनांची म्हायती घेवन तांचेर रोखडीच कारवाय करपाचे निदेश आपणें एफडीएक दिल्यात. ते प्रमाण कारवाय सुरू आसा. फुडारांत ही कारवाय आनीक खर करतले अशें मंत्री राणे हांणी सांगलें.
मजगतीं, हेर राज्यांतल्यान गोंयांत हाडिल्लीं फळां तशेंच हेर खाणांनी रंग वापरिल्ल्याचें वा भेसळ जाल्ल्याचें प्रकार मुखार येत आसात. ताका लागून एफडीए कडल्यान शिमांचेर गस्त घालून अशा पदार्थांची येरादारी करपी वाहनांची झडटी घेतात अशेंय तांणी मुखार उलयतना म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
