भांगरभूंय | प्रतिनिधी
पणजीः राज्याचें सांस्कृतीक दायज सांबाळपी खाजगी संग्रहालयांक उर्बा दिवपा खातीर गोंय सरकारान अनुदान येवजण परतून सुरू केल्या. ते प्रमाण सध्याच्या संग्रहालयांत नवे खाजगी संग्रहालय आनी उदरगतींच कामां तयार करपा खातीर 5 लाख रुपया मेरेन अर्थीक मजत दितले. हे आदले येवजणे खाला 10 ते 25 लाख रुपया मेरेन मजत दिली.
संग्रहालय खात्यान जारी केल्ले अधिसुचोवणे प्रमाण, दुर्मीळ चित्रां, लोककला, हातबरपां, पोरणीं नाणीं वा गोंयची संस्कृताय वा इतिहास दाखोवपी वस्तू सांबाळपी संग्रहालयांक अर्थीक मजत दितले. अर्जदाराक स्वताच्या नांवान जमीन वा इमारत आसूंक जाय वा मालमत्ता 30 वर्सांच्या भाडेपट्टीचेर आसपाक जाय.
ते प्रमाण दुरुस्ती कामां, मुळाव्या साधनसुविधांचो विस्तार, सेवांचें आधुनिकीकरण, सीसीटीव्ही कॅमेरे स्थापन, खाशेले उजवाड येवजण, प्रकाशनां, संकेतथळ उदरगत, आनी कार्यशाळां खातीर निधी दितले.
हे येवजणे खाला मेळिल्ल्या निधीचो उपेग संग्रहालयां खातीर दुर्मीळ वस्तू मेळोवपा खातीर करपाक मेळना. दर वर्सा एक नवें आनी एक पोरणें संग्रहालयाक खातें मजत करतलें. अर्थीक मजत दिवपाचो निर्णय खात्याची तीन वांगड्यांची तज्ञ समिती घेतली. येवजणे खातीर केल्ले सगळे अर्ज न्हयकारपाचो अधिकार तज्ञ समिती कडेन आसा. पयल्या टप्प्यांत खातें 50 टक्के मजतीक मान्यताय दितलें.
लाबार्थी संग्रहालयान पयल्या टप्प्याचो 80 टक्के वापर जाला अशें प्रमाणपत्र सादर केल्या उपरांत समितीच्या शिफारशी उपरांत दुसऱ्या टप्प्याचे 25 टक्के मेळटले. ह्या दोन टप्प्यांतलीं उरिल्लीं 25 टक्के रक्कम तिसऱ्या टप्प्यांत दितले. ही येवजण 2024-25 वित्तीय वर्सा सावन फुडल्या पांच वर्सां मेरेन चालू उरतली अशें अधिसुचोवणेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
