खाजगी विद्यापिठांक लागून सर्त वाडून विद्यार्थ्यांक फायदो जातलोः मुख्यमंत्री

भांगरभूंय | प्रतिनिधी

पणजीः राज्यांतल्या खाजगी विद्यापिठांक लागून शिक्षणीक संस्थां मदीं सर्त वाडटली. हाचो फायदो विद्यार्थ्यांकच जातलो. खाजगी विद्यापिठां आशिल्ल्यान थळाव्या विद्यार्थ्यांक उच्च शिक्षण घेवपा खातीर गोंयां भायर वच्चें पडचें ना. हाका लागून थळाव्या अर्थवेवस्थेकय चालना मेळटली. बिरेस्तारा पणजे जाल्ल्या पारुल खाजगी विद्यापिठाच्या उक्तावण सुवाळ्यांत मुख्यमंत्री डॉ. प्रमोद सावंत उलयताले. ह्या वेळार डॉ. देवांशू पटेल, पारुल पटेल, गीतिका पटेल आनी हेर हाजीर आशिल्ले.
खाजगी विद्यापिठाचें विधेयक म्हज्या कार्यकाळांत मंजूर जालें अशें मुख्यमंत्र्यान सांगलें. खाजगी विद्यापिठांक विरोध करप्यांनी केपें वचून पारूल विद्यापीठ पळोवचें. चालू शिक्षणीक वर्सांत 550 विद्यार्थ्यांनी प्रवेश घेतला. हातूंतले 75 टक्के विद्यार्थी गोंयचें आसात. तशेंच 70 टक्के कर्मचारी थळावे आसात. फुडल्या कांय वर्सांत 1500 थळाव्या लोकांक हांगा रोजगाराची संद मेळटली. पारुलान थळाव्या विद्यार्थ्यांक सुमार 1.1 कोटी रुपयांची शिश्यवृत्ती दिल्या.
थळाव्या विद्यार्थ्यांक आवडीच्या अभ्यासक्रमांत प्रवेश मेळूंक ना जाल्यार तांकां उच्च शिक्षणा खातीर परदेशांत वच्चें पडटा. कांय विद्यार्थ्यांक शिक्षणा खातीर परदेशांत वचप परवडना. अशा वेळार विद्यार्थी शिक्षण घेनात. अशा विद्यार्थ्यां खातीर पारुल सारकें खाजगी विद्यापीठ उपेगी पडटलें. गोंयांत रावून उच्च शिक्षण घेतात जाल्यार पालकांकूय सुशेग मेळटलो. पारुल हांगा वेवसाया खातीर आयिल्लो ना. पारुलाक अ ++ रेटिंग आसा. हें विद्यापीठ राज्यांत बऱ्या दर्जाचें शिक्षण दितलें अशें मुख्यमंत्र्यान सांगलें.
पारुल सोडल्यार राज्य सरकारान गोंयांतल्या आनीक दोन खाजगी विद्यापिठांक परवानगी दिवंक ना. सध्या आनीक खंयच्याच विद्यापिठांक परवानगी दिवचे नात. नाविन्यपूर्ण अभ्यासक्रम आशिल्लें विदेशी विद्यापीठ आसल्यारच आमी विचार करतले अशें मुख्यमंत्री, डॉ. सावंत हांणी सांगलें.

गोंयच्या विद्यार्थ्यांक 20 टक्के सवलत
पारुल विद्यापिठान गोंयच्या विद्यार्थ्यांक ट्युशन फींत 20 टक्के सवलत दिल्या. सध्या हांगा 14 प्रकारचे अभ्यासक्रम शिकयतात. फुडल्या कांय वर्सांत वैजकी, आयुर्वेद, हॉटेल मॅनेजमेंट आनी हेर अभ्यासक्रम सुरू करपाचो विचार आसा अशें डॉ. देवंशू पटेल हांणी सांगलें.