भांगरभूंय | प्रतिनिधी
बंगळुरू, खबरां संस्था : बंगळुरू पुलिसांनी धडक कारवाय करून एका तरणाट्याक ब्लॅकमेलिंगाच्या आरोपा खाला अटक केली. पुलिसांनी दिल्ले म्हायती प्रमाण, मोहन कुमार (२२) अशें दुबाविताचें नांव. ताणें आपले इश्टीणीक २.५७ कोटी रुपया घेवन फटयिल्ल्याचो आरोप आसा. इश्टीण खूब गिरेस्त आसा.
मजगती, पुलिसांनी चवकशे वेळार मोहना कडल्यान ८० लाख रुपया जप्त केले. ताणें इश्टीणीचे खाजगी फोटो आनी व्हिडिओ काडिल्ले. उपरांत ते व्हायरल करपाची धमकी दिवन कोट्यांनी रुपया घेतले. दोगूय जाणां शाळे सावन वांगडा शिकतालीं. कांय काळा उपरांत तीं दोगांय रिलेशनशिपांत आयलीं. मोहनान ते चलयेक लग्न करपाचें आस्वासन दिल्लें. तिका जायते फावट डेटीकूय व्हेल्ली. ह्या वेळार त्या दोगांय मदीं शरिरीक संबंदी निर्माण जाले. ताणें ताचे खाजगी फोटो आनी व्हिडियो क्लीप केल्लें.
मजगतीं, मोहनान फोटो आनी व्हिडिओ खाजगी दवरपाचें आस्वासन दिल्लें. मात कांय वेळान ताणें ब्लॅकमेल करपाक सुरवात केली. पयशे मागले. पिडेस्त तरणाटी भियेली. तिणें वट्ट २.५७ कोटी रुपया दिले. सुरवातेक पिडेस्तान आपले आजयेच्या खात्यांतल्यान मोहनाच्या खात्यांत १.२५ कोटी रुपया ट्रान्सफर केले. उपरांत इल्ले इल्ले करून १.३२ कोटी रुपया दिले. मोहनान तरणाटे कडल्यान गाडी, म्हारग घडयाळ आनी भांगर घेतिल्लें. निमाणें मोहनान चलयल्लो छळ सोंसपाक जावंक नाशिल्ल्यान पिडेस्त पुलीस स्टेशनांत गेली आनी गुन्यांव दाखल केलो.
आरोपी आड भारतीय न्याय संहिता (बीएनएस)खाला गुन्यांव दाखल केलो. आतां मेरेन ८० लाख रुपया जप्त केल्यात. हे विशीं पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
