खाजगी नोकरेचो अणभव

भांगरभूंय | प्रतिनिधी

गोंयकार तरणाटे उद्देगीक मळाचेर नोकऱ्यो करतात. इंटर्न म्हणूनय तांणी त्यो करच्यो. गजाल खरी. पूण थंय ….

समाजाचे आनी राज्याचे सर्वांगी उदरगतीक रोजगार म्हत्वाचें योगदान दिता. कारण बऱ्या पगाराची नोकरी मेळटकच संबंदीत नोकरदार तरणाटो वर्स, दोन वर्सां भितर गाडी घेता, घर दुरुस्त करता. नोकरी लागतकच घरांत पयशे मोडटा. स्वताचो खर्चूय करता. म्हणटकच पालकां वयलें अर्थीक वजें ल्हव जाता. प्रत्येक कुटुंबांतले एक, दोग नोकरेक लागले काय गांवाची आनी पर्यायान राज्याची उदरगत जाता. आदल्या तेंपार गोंयांत नोकरदारांचो आंकडो उणो आशिल्लो. 1990 च्या सुरवातेक जागतिकीकरण आनी डाॅ. मनमोहन सिंग हांच्या अर्थीक धोरणाक लागून गोंयकारांच्या हातांत पयसो घोळपाक लागलो आनी 1995 च्या आसपास कुटुंबांक अर्थीक थिरताय आयली. सांगपाचें म्हणल्यार रोजगार ही उदरगतीची बुन्याद. सरकाराचे इंटर्नशीप येवजणे खाला कांय कंपनीं 10 ते 15 हजार रुपया पगाराच्यो नोकऱ्यो दितात. शिकपी तरणाट्यांनी हाचो लाव घेवचो असो उलो मुख्यमंत्र्यान मारला. सरकारी नोकरे खातीर हाचे मुखार खाजगी कामाच्या अणभवाचें प्रमाणपत्र सक्तीचें करपाचोय सरकाराचो विचार आसा, अशेंय तांणी स्पश्ट केलां.
कांय वर्सां पयलीं गोंयकार नोकरे खातीर राज्या भायर वचपाक तयार नाशिल्ले. फक्त आखाती देश सोडल्यार हेर गांवांनी वचप तांच्या जिवार येतालें. मात मागीर पुणें, बंगळुरू शारांनी ते वचपाक लागले. 1-1 गांवूंच जातलो इतले गोंयकार थंय आतां काम करतात. गोंयांत खरें म्हणल्यार तरणाट्यांक आवडटात तसलेच उद्देग, प्रकल्प हाडपाची गरज आसा. मात हांगां फक्त कश्टाचीं कामां आशिल्ले कारखाने चड येतात आनी अर्थांत तातूंत नोकऱ्यो करपाक उत्तर भारतीय. ह्या उद्देगांक नेमकी कोण आनी कित्याक परवानगी दिता, तें कळना. गोंयकार तरणाटे उद्देगीक मळाचेर नोकऱ्यो करतात. इंटर्न म्हणूनय तांणी त्यो करच्यो. गजाल खरी. पूण थंय सध्या आसात तांकां पगार कितलो मेळटा, कितलीं वरां काम करचें पडटा, ते आवडीन तें काम करतात काय फक्त बेकार बसचें पडटा म्हूण मन मारून काम करतात, हाचो कोणे तरी नियाळ घेवपाक जाय. व्हडल्यो कंपनीं हुशार विद्यार्थ्यांक काॅलेज कॅम्पसांत वचून वेंचून काडटात. ते उपरांत थोडे दीस काम करून ते अमेरिकेक पळटात. गोंयांतलें राहणीमान, म्हारगाय पळयल्यार उणोच 30 हजार रुपया तरी पगार मेळपाक जाय. इंटर्न म्हूण 15- 20 हजारांक तरणाटे काम करता आसतले. तरीय कंपनीन तांकां सवाय कामगारवर्ग हे नदरेन पळोवपाक जायना.
सरकारान फाटले फावटी एप्रेंटीस येवजण चालीक लायिल्ली. वेंचून काडिल्ल्यांक 15 हजार रुपया दिताले. मात एक वर्स पुराय जाले उपरांत तांकां घरा बसचें पडलें. तातूंतल्या थोड्यांक परत घेतल्यात आसतले. हे उमेदवार प्रत्येक तालुक्यांतल्यान येवपाक जाय. सरकारी नोकऱ्यो जाहीर जातात, तेन्ना तांकां प्राधान्य दिवंक जाय. आतां फक्त खाजगी नोकरेचो अणभव आशिल्ल्यांकूच सरकारी नोकरी मेळटली. बरी गजाल. तश्यो आतां फक्त गुणवत्तेचेरूच सरकारी नोकऱ्यो मेळटात. एकलो पसून खंयच वशिल्यान नोकरेक लागना खंय. म्हणटकच हुशारी, गुणवत्ता आशिल्ल्यांकूच नोकरी मेळिल्ल्यान फुडल्या पांच वर्सांत प्रशासनाक गती मेळटली. कामां फटाफट जातलीं. गैरप्रकार सोंपतले. सरकारी प्रशासकीय मळा वयलो भ्रश्टाचार उणो जातलो. आमदारांच्या दारांत वशिलो लावपाक वचपीय आंकडो उणो जातलो.
गोंय आनी उत्तर प्रदेशांतल्या कामगारांचे उदरगती खातीर जोड उपक्रम चालीक लावपाचो निर्णयूय सरकारान घेतला. गोंयांत ह्या राज्यांतले हजारांनी कामगार आसात. बांदकाम आनी हेर मळांचेर ते दिसतात. तांच्या कल्याण खातीर गोंयांत हे उपक्रम चालीक लागतले. थंयचे कामगार गोंयांत आसात. तांचो आंकडोय वाडत आसा. तांच्या हिता खातीर पावलां उखलचींच. ते चुकीच्या मार्गाचेर चलचे नात, हाचीय जतनाय घेवची. कारण गोंयांत दुसऱ्या राज्यांतल्यान आयिल्ले बरेच लोक बेकायदेशीर कामांनी घुस्पल्यात. ह्या उपक्रमा खाला हेर राज्यांच्या सरकारांनी आपले कामगार, मजूर मेळटा ती नोकरी धरून दुसऱ्या राज्यांनी, महानगरांनी कित्याक वतात, ताचो अभ्यास करपाक जाय. ते राज्यांतूच उरतले, हे नदरेन तांकां रोजगार दिवंक जाय. आयज युपी, बिहार, ओडिशा राज्यांतले हजारांनी तरणाटे घरदार सोडून दुसरे कडेन रावतात. तांकां तांच्या- तांच्या राज्यांनी नोकरी मेळ्ळ्यार बरेंच जातलें.
रोजगाराच्या मळाचेर वावुरतनाच, हांगाचे तरणाटे स्वताचो वेवसाय सुरू करतले, हे खातिरूय सरकारान यत्न करचे. विवीध सरकारी येवजण्यो आसात, पूण त्यो घेवपाक कोण मुखार येताच अशें ना. चडश्यांचो भर सरकारी नोकरेचेर. बेरोजगारी वाडल्या, ही गजाल खरी. हाचो अर्थ सगलेच बेकार आसात, अशें न्हय. बरेचशे उण्या पगाराचेर काम करतात. ते सदांच बऱ्या पगाराची, कामाचें समाधान दिवपी नोकरी सोदतात. शिकात आनी नोकरी करात, ही संकल्पना बरी. निदान, सुटयांनी विद्यार्थी अर्धवेळ नोकरी करतले, हे खातीर सरकारान खास येवजण्यो चालीक लावंक जाय. बेरोजगारी हें उदरगतीचे वाटेंतलें व्हडलें आडमेळें हें आमी सांगपाक नाका.