भांगरभूंय | प्रतिनिधी
मुख्यमंत्री : सरकाराक 500 कोटींची येणावळ अपेक्षीत
भांगरभूंय | प्रतिनिधी
पणजी : सुदारीत मीन डंप धोरणाक सरकारान मान्यताय दिल्ल्यान खाजगी जमनी वयल्या आनी जमीन रूपांतरण शुल्क भरूंक नाशिल्ल्या डंपांची सरकार ई – पावणी करतलें. आतां मेरेन सरकारान अशे तरेचे 30 ते 40 डंप सोदून काडिल्ल्यान ई – पावणेंत सादारण 500 कोटींची येणावळ सरकाराक अपेक्षीत आसा. मुख्यमंत्री डॉ. प्रमोद सावंत हांणी मंत्रिमंडळ बसके उपरांत पत्रकार परिशदेंत ही म्हायती दिली.
डंप धोरणाक सरकारान हे आदींच मान्यताय दिल्या. आदल्या धोरणांत कांय बदल केल्यात. ते प्रमाण खाजगी जमनींचो दावो करूंक नाशिल्ल्या आनी जमीन रुपांतरण शुल्क भरूंक नाशिल्ल्या डंपाचो सोद घेतले. डंपाच्या लीजधारकांक लीजाचें शुल्क दितले. पारदर्शक पद्दतीन पावणेची प्रक्रिया सुरू जातली. उपरांत ती जमिनूय मेकळी जातली, अशें तांणी सांगलें.
ईएसआय हॉस्पिटलां खातीर नर्स, कारकुना सयत 29 दोतोरांची कंत्राटी तत्वाचेर भरती जातली. तिका मंत्रिमंडळान बिरेस्तारा मान्यताय दिली. खोर्ली भलायकी केंद्रांत केंद्र सरकाराच्या भलायकी आनी कुंटुंब कल्याण मंत्रालया वतीन आधुनीक ग्रामीण भलायकी संशोधन केंद्र स्थापन करतले. हे खातीर 350 चौमि जमिनीच्या हस्तांतरणाक मान्यताय दिल्या, अशें डॉ. सावंत हांणी सांगलें.
अर्थीक फटींगपणाच्या प्रकरणांचो तपास योग्य दिशेनः मुख्यमंत्री
पणजी : नोकरे खातीर पयशे दिवपाचीं प्रकरणां, बँकांनी चलिल्लीं फटींगपणां, जमीन हडप, चड व्याजाचें हांयस दाखोवप अश्या सगळ्या अर्थीक फटींगपणाच्या प्रकरणांचो तपास पुलीस योग्य तरेन करतात. अर्थीक भानगडींत राजकारण्यांचो हात ना. सगळ्यांचेर पुलीस योग्य ती कारवाय करतले, अशें मुख्यमंत्री डॉ. प्रमोद सावंत हांणी स्पश्ट केलें. पर्वरी मंत्रालयांत जाल्ले मंत्रिमंडळ बसके उपरांत पत्रकार परिशदेंत उलयतना मुख्यमंत्र्यांनी ही म्हायती दिली.
सरकारान मारिल्ल्या उल्या उपरांत लोक कागाळी करपाक मुखार सरले. बुधवारा कुडचड्यां एकाच दिसा 17 कागाळी दाखल जाल्यो. तपास करपा खातीर पुलिसांक स्वातंत्र्य दिलां. हातूंत फातोड्डें ते लंडन प्रकरणांचोय आस्पाव आसा. पुलिसांचे कारवायेक लागून लोक सतर्क जाल्यात. कुडचडेंची बँक भानगड, म्हापशेंचे इमारत भानगडी उपरांत पर्वरेय फटयिल्ल्याचें एक प्रकरण उक्ताडार आयलां. ह्या सगळ्या प्रकरणांचो तपास जावन दोशींचेर पुलीस कारवाय करतले, अशेंय मुख्यमंत्र्यांनी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
