भांगरभूंय | प्रतिनिधी
जसपाल सिंगः बरी सेवा दिवपाचो होमगार्डांक सल्लो
भांगरभूंय । प्रतिनिधी
वाळपयः गोंयांत शांतिकाय नंदप खूब गरजेचें. रस्त्याचेर जावपी अपघात आडावप हें लेगीत व्हड आव्हान. हे खातीर पुलिशेच्या भुजाक भूज लावन लोकांक बरी सेवा दिवपाचो होमगार्डान यत्न करप गरजेचें आसा. प्रशिक्षणाच्या काळांत मेळिल्लो गुरुमंत्र प्रत्यक्षपणान वापरात. आपली लागणूक सिद्ध करात. लोकांमदीं पुलीस खात्याची प्रतिमा नितळ दवरपा खातीर आदार करात, खाकी वर्दीक खत लागपाक दीवं नाकात, असो उलो गोंय पुलीस खात्याचे म्हासंचालक जसपाल सिंग हांणी मारलो.
वाळपय पुलीस प्रशिक्षण केंद्रांत योजीत केल्ल्या होमगार्डांच्या प्रशिक्षण पूर्णदीक्षांत सुवाळ्यांत सिंग उलयताले.
शुक्रारच्यान 261 होमगार्ड सरकाराचे सेवेंत रुजू जाल्यात. तांकां वेगवेगळ्या सुवातांचेर तैनात करतले. तांणी बरी सेवा दिवची आनी आपली लागणूक पाळची, अशेंय सिंग हांणी सांगलें.
कांय म्हयन्यां आदीं गोंय सरकारान वट्ट 261 होमगार्डांची भरती केल्ली. तांकां वाळपयच्या पुलीस प्रशिक्षण केंद्रांत प्रशिक्षण दिताले. तें प्रशिक्षण पुराय जालां. तांचो दिक्षांत सुवाळो शुक्रारा प्रशिक्षण केंद्राच्या मैदानार जालो. ह्या वेळार पुलीस खात्याचे म्हासंचालक जसपाल सिंग हांणी परेडाची पळोवणी केली आनी प्रशिक्षणार्थी होमगार्डा कडल्यान मानवंदना स्विकारली.
प्रशिक्षण केंद्राची प्राचार्य अधिक्षक सुचिता देसाय हांणी येवकार दिलो आनी उपस्थितांक सोपूत दिलो. ह्या वेळार देसाय हांणी सांगलें, प्रशिक्षणाच्या काळांत खूब खेपे खूबश्या समस्यांक फुडो करचो पडटा. मात एक बरो होमगार्ड जातलो जाल्यार, खूबश्या संकश्टांक येसस्वी तरेन फुडो करप म्हत्वाचें आसता. प्रशिक्षणा वेळार आयिल्ल्या अणभवाचो फायदो दरेका होमगार्डान वेगवेगळ्या सुवातांचेर सेवा दितना वापरांत हाडचो, अशीय तांणी विनवणी केली. अमीत नायक हांणी सुत्रसंचालन केलें, उपप्राचार्य नोलोक्सो रापोझ हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
