भांगरभूंय | प्रतिनिधी
रोहन कासकार : बशींचें लुकसाण जावचें न्हय म्हूण उपाय
भांगरभूंय । प्रतिनिधी
पणजीः गांवगिऱ्या वाठारांत अशीर रस्त्या कुशीक झाडांचे खांदे रस्त्यार आयिल्ल्यान कदंब बशींचें लुकसाण जाता अशी कागाळ कदंब म्हामंडळा कडेन आयल्या. हे विशीं आमी ह्या झाडांचे खांदे बेणपा खातीर पंचायतींक पत्र बरयलां. पूण ह्या खाद्यांक लागून बशींचें व्हड प्रमाणांत लुकसाण जावंक ना वा प्रवाश्यांक कसलेच त्रास जावंक ना, अशें कदंब येरादारी म्हामंडळाचे सरवेवस्थापक रोहन कासकार हांणी सांगले.
पुराय गोंयभर रस्त्या कुशीक झाडां वाडल्यांत आनी ह्या झाडांचे खांदे बशींक आपटून बशीचे हारशे फुटपा सारक्यो घडणुको घडटात, अशी कागाळ कांय कदंबच्या कर्मचाऱ्यांनी केल्ली.
हे खांदे चुकोवपाचे भानगडींत बशीचे ड्रायव्हर बशी रस्त्याच्या मदीं व्हरतात. हाका लागून लागून अपघात जातात. हे खातीर रस्त्यार येवपी खांदे बेणचे, अशी मागणी कर्मचाऱ्यांनी केल्या.
हे विशीं उलयतना कदंब येरादारी म्हामंडळाचे सरवेवस्थापक रोहन कासकार हांणी सांगलें, ह्या रस्त्यार येवपी खांदे बेणपा खातीर आमी पंचायती कडेन नेमान पत्रवेव्हार करतात.
ज्या गावांनी अशीर रस्ते आसात थंय पावसाळ्यांत झाडां वाडून ताचे खांदे रस्त्यार येतात आनी ह्यो घडणुको घडटात. आमी दर वर्सा पंचायतीक बरोवन तीं झाडां बेणपाक सांगतात. तीं झाडां बेणप ही पंचायतीची जापसालदारकी, अशें कासकार हांणी सांगलें. रस्त्यार येवपी झाडा विशीं आमचे कडेन एक कागाळ आयला. हे विशीं आमी प्रक्रीया चालिक लायल्या. जर बस सादारण गतीन चलता जाल्यार त्रास जायना. जर बसीक नेटान धावता जाल्यार ही झाडा येवन आपटतांत. रस्तो बारीक जालो काय फुडल्यान येवपी वाहनांक वाट दिवपा खातीर बसी देगेक वयतांत आनी तेन्ना ह्यो फाटे आपटांत, अशें कासकार हांणी सांगले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
