भांगरभूंय | प्रतिनिधी
भांगरभूंय । प्रतिनिधी
माशेलः आंतरराष्ट्रीय अणकार दीस फाटल्या सप्तकांत खांडोळें म्हाविद्यालयाच्या हिंदी विभागा वतीन मनयलो. ह्या निमतान आयोजीत केल्ले कार्यावळीक मुखेल सोयरी विज्ञान लेखिका तशेंच अनुवादक डॉ शुभ्रता मिश्रा हिचे हस्तुकीं कार्यावळीचें उक्तावण केलें. प्राचार्य डॉ पूर्णकला सामंत हिणे सगल्यांक येवकार दिलो. हिंदी विभाग मुखेली आशा गेहलोत हिणे प्रास्तावीक केले.
म्हाविद्यालयाचे विद्यार्थी मृणाली साखळकार आनी श्वेता गांवकार हांणी प्रा. सची नायक आनी दीपाली सुतार हाच्या मार्गदर्शना खाला संपादीत केल्ल्या विद्यार्थ्यांच्या अणकारीत साहित्याचेर आदारीत ‘अनुसर्जन’ ई- पत्रिकेचे प्रकाशन ह्या वेळार केलें. डॉ शुभ्रता हिणे आंतरराष्ट्रीय पांवड्यार अणकाराक आशिल्लें म्हत्व पटोवन दिले. रवींद्रनाथ टागोर हांची गीतांजली ही साहित्यकृती फकत अणकाराक लागून संवसारीक साहित्य मळार पावपाक शकली आनी तिका साहित्याचें नोबेल मेळ्ळें अशें तिणे सांगलें. भारतीय भाशांनी संवसारीक दर्जाचें साहित्य आसा मात अणकार जायना म्हणून ते संवसारांतल्या साहित्य मोगीं मेरेन पावपाक शकना अशेंय तिणे सांगलें.
कार्यावळीचें सूत्रसंचालन दीक्षा गिरोडकारान केलें. उपकार सविता मुलाक्षीन मानले. समिक्षा नागेश वेळीप, श्रद्धा कवळेकार आनी अणकार करपाविशींचे आपले अणभव सांगलें. प्रगती चोडणकारान सोयऱ्यांची वळख करून दिली. कार्यावळीक म्हाविद्यालयांतल्या हिंदी, इंग्लिश, कोंकणी आनी मराठी विभागांचे प्राध्यापक आनी विद्यार्थी हाजीर आशिल्ले. कार्यावळीचें आयोजन डॉ सपना पेळपकार आनी सची नायकान केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
