भांगरभूंय | प्रतिनिधी
दुदाच्यो सोसायट्यो रडत-मरत चलतात. नवे पिळगेक ह्या धंद्यांत मात्तूय रस ना.
जाणें चोंच दिल्या ताणेंच दाणें तयार दवरल्यात. गोरवांक तण-पाणी दिलां. ताका सगळ्यांची काळजी. भुरगें ह्या संवसारात येना फुडें आवयचें दूद तयार आसताच. जर आवयक दूद येना जाल्यार गोमातेचें दूद तयार आसता. त्या भायर बोकडेचें दूद आसाच. तें खूब कमी प्रमाणात मेळटा. म्हशीचें दूद पचपाक कठीण. तें पातळ करून दिवचें पडटा. जर्सी गायेचें दूद तितलेंशें बरे न्हय. एकंदरीत गांवठी गायेचें दूद हें अम्रृत म्हणल्यार जाता.
पयलीं आपलें दूद खपोवपा खातीर दूद कंपनींनी बरीच आक्रमकपणा दाखयलीं, पूण मागीर जेन्ना आवयचें दूद हेंच भुरग्याचे भलायकेक बरें हें सरकारान नेट दिवन सांगलें, तेन्ना दूद कंपनी एक पावल फाटीं सरून आवयच्या दुदा फाटल्यान आपलो नंबर म्हणून सांगपाक लागल्यो.
एका काळार दर घरालागीं गोठो आसतालो. गरजे पुरतें दुद, ताक, लोणी, तूप घरच्या घरा तयार जातालें. शेताक शेण मेळटालें. बैल गाडयेक बैल, शेत नांगरपाक रेडेपाडे मेळटाले. शेतकारांनी बायोगॅस प्लांट पसून बांदले. आयज शेताक, कुळागराक शेणा बदला रासनायक सारें घालतात. ताका लागून जमनी निसू जावपाक लागल्यात. एक दीस हे जमनींत कांयच पिकचें ना. मागीर आमकां कपलार हात मारचो पडटलो.
दुदाचें उत्पादन वाडचें म्हणून सहकारी दूध सोसायटी आयल्यो. शेतकारांक रिणां आनी अनुदान मेळपाक लागलें. गोरूं मेल्यार इंसुरेंस मेळपाक लागलो. इतलें आसून पसून दुदाचें उत्पन्न फावो त्या प्रमाणात वाडूंक ना.आयज गोंयांत दर दिसा कितलें तरी दूद शेजारच्या राज्यांतल्यान येता. दुदाच्यो सोसायट्यो रडत-मरत चलतात. नवे पिळगेक ह्या धंद्यांत मात्तूय रस ना. कोणाक शेणाक हात लावपाचो ना. सगळ्यांक सरकारी नोकरी जाय. अशा वेळार आमकां खांडोळेंचो खुशाली सावंता सारको मनीस दिसता.
ल्हानपणां पासून ताचो गायी- म्हशी कडेन संबंध आयलो. सकाळ सांज तांकां चरपाक व्हरप, तांचे खातीर हरवें सुकें तण हाडप, व्हाळार तळयेत न्हाडोवप ही कामां सदाचींच. गाय म्हस वियेता तेन्ना तर खुबच काम. सुशेग म्हण्टा तो नाच.
गोरवांक दोळ्यांत शेड्डी म्हणून जाताली. गोरवां बारीक जातालीं. शेंपडेचे केस झडटाले. मागीर रघुभगता सारको गांवठी दोतोर गोरवांच्या दोळ्यांचें ऑपरेशन करतालो. गोरुं चार-पांच दिसांनी सडसडीत जातालें. तेन्ना गांवांगांवांनी रघूभगत आनी खुशाली सावंत आसले. आयज अशे लोक दिसानदीस कमी जायत आसात. गांवा खातीर दूद दिवपी गोरवां नात, वरव गोटो दिवपी शेतां नात,नाल्ल,आंबे पणस दिवपी भाटां नात, न्हंयेंतलें नुस्तें, खुबे ना अशे दीस पयस नात. मागीर आमी कितें खातले? जमनी विकून जमयिल्लो पयसो आमचें पोट भरतलो काय? हाचो शांत चित्तान विचार करपाक जाय.
–
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
