भांगरभूंय | प्रतिनिधी
भांगरभूंय । प्रतिनिधी
फोंडेंः फोंडेचो आमदार आनी कृशी मंत्री रवी नायक, कुर्टी- खांडेपार पंचायत मंडळ आनी थळाव्या लोकांचे मागणे प्रमाण खांडेपार हांगा सुरू केल्ल्या उप विभागीय वीज कार्यालयांचें वीज मंत्री सुदिन ढऴळीकार हांणे दिवली पेटोवन उक्तावण केलें. फुडल्या वर्स भरयां वीजे संबंदीच्यो सगल्यो समस्या सुटाव्यो करून लोकांक बरी सेवा दिवपाचो यत्न करतले अशें ढवळीकारान ह्या वेळार सांगलें.
उक्तावणाचे कार्यावळीक जिल्हो पंचायत वांगडी प्रिया च्यारी, पंच वांगडी बाबू च्यारी, नीळकंठ नायक, वीज खात्याचो कार्यकारी अभियंतो पीपी भारतना आनी हेर मानेस्त हाजीर आशिल्ले. कर्नाटकांत काँग्रेस पक्षाचें सरकार सत्तेर आयिल्ल्यान गोंयांत म्हादय प्रश्नाचेर आंदोलन करपी काँग्रेस वावुरप्यांन कर्नाटकाच्या मुख्यमंत्र्याची भेट घेवंन कळसा-भंडुरा डीपीआर फाटी घेवपाची विनवणी तांका करची अशें ढवळीकारान सांगलां. राज्यातल्या तामनार प्रकल्पाचें काम थंड पडिल्ल्यान फुडल्या दोन म्हयन्यांत कर्नाटक सरकाराचें धोरण स्पश्ट जातले अशेंय ताणे सांगलें.
उप विभागीय वीज कार्यालयाच्या उक्तावणाक रवी नायक, सरपंच संजना नायक, उपसरपंच विल्मा परेरा आनी हेर पंच गैरहाजीर रावल्ल्यान फोंडें मतदारसंघात बरीच चर्चा जाली. मजगतीं, खांडेपार हांगा जंक्शनार वीज खात्या वतीन लायिल्ल्या म्हायती तकट्या वयल्या जिल्हो पंचायत वांगडी प्रिया च्यारीच्या नांवांचेर कोणे तरी काळो रंग लायलो. ताका लागून फोडें मतदारसंघांत भाजपा आड मगो अशें राजकारण परत सुरू जालां अशी खबर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
