भांगरभूंय | प्रतिनिधी
बेकायदो रेंव काडिल्ल्यान पोरण्या थळांक धोको
भांगरभूंय । प्रतिनिधी
फोंडें : मुर्डी खांडेपार न्हंयेचेर फोंडें मामलेदार, फोंडें पुलीस आनी कॅप्टन ऑफ पोर्ट हांणी मुर्डी खांडोपारा शुक्रारा रातीं उसरां धाड घातली. हे धाडींत बेकायदो तरेन काडिल्ली सुमार 30 क्युबीक मिटर रेंव जप्त केली. धाडी वेळार पुलिसां सयत अधिकारी हाजीर आशिल्ले, हे विशीं मामलेदार भिकू गांवस हांणी पुश्टी केल्या. बेकायदो तरेन रेंव काडप्यां आड बेगिनूच गुन्यांव नोंद जातलो, अशें तांणी सांगलें.
बेकायदो तरेन रेंव काडपाच्या प्रकारा विशीं उलयतना थळाव्या लोकांनी सांगलें, खांडेपार न्हंयेंत बेकायदो तरेन रेंव काडटात अश्यो कागाळी खूब आदीं सावन पंचायतींत दाखल जाल्यात. अखेर शुक्रारा मध्यान रातीर धाड घातले उपरांत बेकायदो तेरेन रेंव काडपाचो प्रकार उक्तडार आयलो. तीन म्हयन्यां आदीं बागवाड्या वयल्या लोकांनी संबंदीत अधिकाऱ्यां कडेन कागाळ दाखल केल्ली, पूण ताचे कडेन आडनदर जाल्ली. उपरांत परतन दोन खेपे पुरातत्वीय सुवातांचेर पंपा वरवीं बेकायदो तरेन रेंव काडटात अशी कागाळ केल्ली. थंय सुमारा भायर रेंव काडप चालू आशिल्ल्यान पोरण्या थळांक धोको निर्माण जाला, अशेंय थळाव्या लोकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
