भांगरभूंय | प्रतिनिधी
फोंडें: खांडेपारच्या जंक्शनाचेर ट्रॉली, कंटेनर आनी स्कुटर हांचे मदीं अपघात जालो. अपघातांत स्कुटर चालक सुहास तळेकार (कवळें- फोंडें) हांणी रस्त्याचे कुशीक उडी मारिल्ल्यान बरे तरेन वाटावलो. ह्या वाठारांत वाडटे अपघात आडावपा खातीर गरजेचे उपाय करपाची मागणी थळाव्या लोकांनी केल्या.
मेळिल्ले म्हायती प्रमाण फोंडेंच्यान मोलेचे दिशेन जीए 06 टी 0905 नंबराचो कंटेनर वतालो. खांडेपार जंक्शना लागसार पावताच दावे वटेनच्या रस्त्या वयल्यान येवपी एनएल 01 एन 8882 नंबराची ट्रॉली चालकाक दिसली. त्या वेळार कंटेनर चालकान ब्रेक लायलो, पूण तो लागूंक नाशिल्ल्यान कंटेनराचो धपको ट्रॉलीक बसलो. त्या वेळार जंक्शना जीए 05 वाय 0318 नंबराचे स्कुटरी वयल्यान सुहास येतालो. तांणी वेळार रस्त्याचे कुशीक उडी मारिल्ल्यान तो बरे भशेन वाटावलो.
अपघाताची म्हायती मेळटाच फोंडें पुलीस स्टेशनाचे हवालदार कृष्णनाथ नार्वेकार हांणी अपघाताचे सुवातेर वचून पंचनामो केलो. जंक्शनाचेर रस्त्यो येरादारी खातीर बंद जाल्ल्यान सगळी येरादारी अंडरपास रस्त्या कुशींतल्यान घुंवडायली. त्या वेळार फोंडें येरादारी पुलिसांनी येरादारी सुरळीत करपाक मजत केली. खांडेपारच्या घातक जंक्शनाचेर खूबशे अपघात जातात. ताका लागून मुर्डी खांडेपारां अवजड वाहनां दिसाचीं सोडचीं न्हय, अशी मागणी थळाव्या लोकांनी केल्या. ह्या जंक्शनाचेर खूबशीं अवजड वाहनां कुशीच्या दुकानांत घुसून व्हड अपघात जावपाची शक्यताय आसा, अशें थळाव्या लोकांचें म्हणणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
