भांगरभूंय | प्रतिनिधी
नुसीचें तत्काळ वाडीचें आस्वासनः हॉलीडे होमाचेंय जातलें नुतनीकरण
भांगरभूंय । प्रतिनिधी
मडगांवः खलाशांच्या विधवा बायलांक नॅशनल युनियन ऑफ सीफेअर्स ऑफ इंडिया (नुसी) कडल्यान दर म्हयन्यात 200 रुपया अर्थीक मजत दितात. हे रकमेंत वाड करपाची मागणी गोवन सीमन असोसिएशन ऑफ इंडियाच् (जीएसएआय) कडल्यान नुसी कडेन केल्ली. ते प्रमाण राष्ट्रीय सरचिटणीस मिलींद कांदळगावकर हांणी हे रकमेंत वाड करून तत्काळ दर म्हयन्याक 800 रुपया दितले, अशें आस्वासन दिलां. ही म्हायती जीएसएआयचे अध्यक्ष फ्रँक व्हिएगस हांणी दिली.
कांदळगावकर हांणी जीएसएआयच्या माडेलांतल्या कार्यालयाक भेट दिली. ह्या वेळार साबार प्रस्नांचेर चर्चा जाली. हाचो फायदो गोंयांतल्या खलाशांचे प्रस्न सुटावे जावपाक जातले. एनएसयूआय आनी जीएसएआय ह्या दोनूय संस्थांनी एकवटीत काम केलें जाल्यार खलाशां खातीर बरें काम जातलें. नुसी कडल्यान खलाशांच्या विधवा बायलांक 200 रुपया अर्थीक मजत मेळटा ती वाडोवन 800 रुपया करची, अशी मागणी केल्ली, ती मागणी मान्य केल्या, अशें व्हिएगस हांणी सांगलें.
तेचवरी खलाशांच्या विधवां बायलां खातीर फूड सब्सिडी येवजण आसा. अर्थीक मागास खलाशांच्या विधवा बायलांक धान्य दितात. हे येवजणे खाला खलाशांच्या ज्या विधवा बायलांची अर्थीक बरी ना, तांकां धान्य दितले, अशें कांदळगावकर हांणी सांगलें.
नुसी हॉस्पिटल कितल्याशाच वर्सां सावन बंद आसा. ताचे कडेन लक्ष ओडून तें सुरू करपाची मागणी केली. तशेंच खारेबांदार हॉलिडे होन आसा. ताची दोनूय संस्थांच्या पदाधिकाऱ्यांनी पळोवणी केली. ह्या होलिडे होमाचें नुतनीकरण करतले. थंय आशिल्लें कम्युनिटी सभाघर सुरू करून तो खलाशां खातीर उण्या भाड्यान चालीक लावपाचें आस्वासनूय दिल्ल्याची म्हायती कांदळगावकर हांणी दिली. खूबशा बोटींचेर गोंयकार तरणाटे आसात. काम करपी ह्या तरणाट्यांक घरच्यांक बोट दाखोवपा खातीर बंदी करतात, तो प्रस्न उपस्थीत करून उपाय काडपाची मागणी केली. नुसी अकादमी परतून सुरू करपाचीय मागणी केली. तेचवरी सर्वसामान्य लोकां खातीर तीन म्हयने, स म्हयन्यांचे अभ्यासक्रम सुरू करपाची लेगीत मागणी केली. तरणाट्यांक बोटीर वतना सीडीसी काडटना येवपी आडखळी पयस करचे खातीर यत्न करचे, अशेंय ह्या वेळार मागलें. नुसीच्या सरचिटणीसान जीएसएआयच्या कार्यालयाक भेट दिल्ल्यान जाल्ले चर्चेंत जे कितें मतभेद आशिल्ले ते पयस जाले, अशें व्हिएगस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
