भांगरभूंय | प्रतिनिधी
मडगांव : गोंयच्या खलाशांक पेन्शनाचो लाव भाजप सरकाराच्या कार्यकाळांत मेळ्ळो. ही येवजण मनोहर पर्रीकर सत्तेंत आसतना केली, चर्चिल आलेमांव सरकारांत आसतानाय ही येवजण जावंक नाशिल्ली. ताचे खातीर ल्हान लोकांचो विचार आनी व्हिजन आसचें पडटा. तें भाजप सरकारा कडेन आसा. ही येवजण आतां कायमची करतले, अशी म्हायती मुख्यमंत्री डॉ. प्रमोद सावंत हांणी दिली.
मडगांवच्या रवींद्र भवनाच्या सभाघरांत गोवन सीमन असोसिएशन ऑफ इंडिया वतीन नावीक दिसाचें आयोजन केल्लें. ह्या वेळार मुख्यमंत्री डॉ. प्रमोद सावंत, एनआरआय आयुक्त ऍड. नरेंद्र सावयकार, अध्यक्ष फ्रँक व्हिएगस, आदले मंत्री चर्चिल आलेमांव, कॅप्टन ऑफ पोर्टसचे ऑक्टाव्हिओ रॉड्रिग्ज, डॉ. विजय बेलानी, अनुराग कृष्णा, शिवराम कामत आनी हेर हजर आशिल्ले. ह्या वेळार खलाशी म्हणून काम केल्ले आदले मुख्यमंत्री चर्चिल आलेमाव हांचो भोवमान केलो.
मुख्यमंत्री डॉ. प्रमोद सावंत हांणी सांगलें, नाविकांक म्हत्वाचो घटक मानतात. नावीक दीस इतले व्हड प्रमाणांत मनोवपी गोंय हें एकूच राज्य. राज्यांतल्या खलाशी वर्गाक सुमार देडशे वर्सांचो इतिहास आसा. नील अर्थवेवस्थेचो विशय प्रधानमंत्री नरेंद्र मोदी हांणी फुडाकार घेवन चालीक लायला. ह्यान पयलीं हाचें म्हत्व कोणाकूच कळूंक नाशिल्लें. खलाशी म्हणून काम केल्ल्यांनी जायतीं वर्सां कुटुंबा पसून पयस सारल्यांत. तशें अर्थवेवस्थेकूय आदार दिला. गोवा सीमन असोसिएशन फाटल्या इकरा वर्सां सावन बरे तरेन काम करता. गोंयच्याच न्हय तर राज्या भायल्याय खलाशांचे प्रस्न तांणी हातांत घेतिल्ले. मेरीटायम कायद्यांच्या निर्मिती उपरांत खलाशांच्या विवीध तरेन जावपी सतावणूक उणी जाल्या. बोटीचेर सुरक्षा आनी सन्मान दोनूय मेळटा. आतां बायलोय बोटींचेर काम करपाक लागल्या. गोंयच्या मेरीटायम क्षेत्राची उदरगत जावची, वेपारा खातीर चडांत चड दर्याचो वापर जावचो हाचे खातीर मुळाव्या सुविधां सयत मनीसबळ तयार जावपाची गरज आसा. नव्या तंत्रज्ञानाचो वापर करपाची गरज आसा.
खलाशांच्या प्रस्नांचेर सरकार गंभीर
खलाशांक गरजेच्या कुशळटायेची उदरगत करपा खातीर दोनूय इन्स्टिट्यूटांनी कोर्स उपलब्ध आसात. मेरीटाइम इन्स्टिट्यूट वास्को हांगा फकत २६ प्रशिक्षणार्थी आसात. मेरीटायम संबंदीत कोर्स हे नोकरी उपलब्ध करपी कोर्स आसात. तांची म्हायती तरणाट्यांक दिवपा खातीर सोसिएशनान काम करचें. सरकार खलाशांच्या समस्यांकडेन गंभीरपणान पळयता. त्यो सोडोवपाचो यत्न करता, अशें मुख्यमंत्री डॉ. प्रमोद सावंत हांणी सांगलें.
लोक चर्चिल हांकां विसरूंक ना: मुख्यमंत्री
चर्चिल आलेमाव हांणी खलाशी म्हणून काम केलां. तशेंच राजकारणांतूय मुख्यमंत्रीपदूय मेळयलां. ही सादी गजाल न्हय. जाल्यार खलाशां खातीर ही अभिमानाची गजाल. तांकां राजकारणी विसरपाक शकतात, मात लोक तांकां विसरूंक ना. लोकांचो आवाज जावन ते लोकांचे प्रस्न मांडटात. हाका लागून लोक परत चर्चिल हांचो उगडास काडटले, अशें मुख्यमंत्र्यान म्हणलें.
भाजप सरकार परत आयल्यार पेन्शनांत वाड
राज्यांत खलाशांच्या पेन्शनांत ५०० रुपया वाडोवपाची मागणी केल्या. भाजपाचें सरकार फुडले फावटीं वेंचून आयल्यार ह्या पेन्शनांत एक हजारांची वाड करतले. फकत राज्यांत भाजपचें सरकार वेंचून हाडपा खातीर सहकार्य करचें. खलाशीय भाजप सरकाराच्या फाटल्यान आसा हें आमकां कळुदी, अशेंय तांणी मुखार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
