भांगरभूंय | प्रतिनिधी
जोड पळोवणे उपरांत घाण उदक व्हरपी टँकर आडावपाचो निर्णय
म्हापशें: खर्रे, सुकूर हांगा उक्तडार घाण उदक उडयिल्ल्यान सडो वाठाराi[ पंचायतीन जोड पळोवणी केली. हांगा फाटल्या 20 वर्सां सावन सिवेज टँकरा वतीन घाणयारें उदक उडयत आशिल्ल्याचो दावो थळाव्या लोकांनी केलो.
काल (बिरेस्तारा) सकाळीं सुकूर पंचायती वतीन जोड पळोवणी केली. ह्या वेळार मंत्री रोहन खंवटे, बार्देसचे उपजिल्होधिकारी वसंत दाभोलकार, मामलेदार अनंत मळीक, सरपंच सोनिया पेडणेंकार, भलायकी केंद्राधिकारी डॉ. सिकंदर तलवार, पुलीस उपअधिक्षक विश्वेश कर्पे, निरिक्षक राहुल परब, प्रदुशण नियंत्रण मंडळाचे अधिकारी, घाण उदक वेवस्थापन म्हामंडळाचे अधिकारी, पंचायत मंडळ आनी कागाळदार थळावे लोक हाजीर आशिल्ले.
खर्रे हांगासरल्या सर्वे क्रमांक 220/1 ह्या सड्या वेल्या जमनीर खूब वर्सां सावन घाणयारें उदक उडयतात. जाका लागून आशिकुशीच्या लोकांचे भलायकेक घात निर्माण जावपा सयत पर्यावरणाचो ऱ्हास चालू आसा अशी कागाळ थळाव्यांनी पंचायती कडेन केल्ली.
पळोवणे वेळार घडणूक थळार एक हंगामी स्वरुपाची इमारत आनी घाण उदक सोडपाचें साहित्य दिसून आयलें. ताका लागून सदर बांदकामाचे गेटीक सील मारलें. तशेंच सदर साहित्य जप्त करपा सयत संबंदितांचेर कायदेशीर कारवाय करपाचे निदेश ह्या वेळार मंत्री खंवटे हांणी हाजीर आशिल्ल्या अधिकाऱ्यांक दिले.
मंत्री खंवटे हांणी म्हणलें, हांगा उक्तडार घाण उदक सोडत आशिल्ल्याची कागाळ आयिल्ली ते प्रमाण परिस्थिती समजून घेवपा खातीर जोड पळोवणी केली. ही परिस्थिती सामकी हुस्को करपा सारकी आसून हो बेकायदो प्रकार सुरूच उरल्यार फक्त लोकांचे भलायकेचेर परिणाम जावचो ना जाल्यार खर्रे गांवांतल्या बांयांचें उदक लेगीत दुशीत जावंक शकता.
ताका लागून हांगा घाण उदक व्हरपी टँकराक प्रवेश बंद करचो आनी टँकर दिसून आयल्यार तो रोखडोच जप्त करचो. ह्या घाण उदकाचे नमुने घेवन विश्लेशण अहवाल भलायकी खात्याक सादर करचो अशी सुचोवणी आपणें पंचायत आनी प्रदुशण नियंत्रण मंडळाक केल्या.
संबंदीत वाठाराची कागदपत्रां जप्त करचीं तशेंच खोलायेन चवकशी करून गुन्यांवकारां आड कायदेशीर कारवाय करची, अशी सुचोवणी उपजिल्होधिकारी, मामलेदार आनी पुलिसांक केल्या. कांय वर्सां पयलीं हांगा एक मोटो जमीन घोटाळो जाल्लो. ही जमीन ताब्यांत घेवपाची सुचोवणी सेरुला कोमुनिदादीक केल्या अशी म्हायती मंत्री रोहन खंवटे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
