भांगरभूंय | प्रतिनिधी
पणजी : विधानसभा वेंचणुकेच्या खर्चाचो तपशील सादर करपाक अपेस आयिल्ल्यान विधानसभा वेचणुकेंत सांखळी मतदारसंघांतलो उमेदवार 3 वर्सां खातीर अपात्र थारला. फुडल्या तीन वर्सां मेरेन विधानसभा तशेंच लोकसभा वेंचणूक ताका लडोवपाक मेळची ना. हे विशींचो आदेश वेंचणूक आयोगान जारी केला.
सुनील सुरेश फुलारी हाणें 2022ची विधानसभा वेंचणूक सांखळी मतदारसंघांतल्यान लडयिल्ली. सांखळी मतदारसंघांतल्यान मुख्यमंत्री डॉ. प्रमोद सावंत हे भाजपाचे उमेदवार वेंचून आयले. हांचे आड सुनील सुरेश फुलारी हांणे वेंचणूक लडयिल्ली. 10 मार्च 2022 दिसा वेंचणुकेचो निकाल जाहीर जालो. निकाला उपरांत एक म्हयन्या भितर उमेदवाराक खर्चाचो तपशील बिलां सयत वेंचणूक आयोगाक सादर करचो पडटा. 9 एप्रील 2022 मेरेन खर्च सादर करपाची मुजत आशिल्ली. हे तारखे मेरेन सुनील सुरेश फुलारी हाणें खर्चाचो तपशील सादर केलो ना. खर्चाचो तपशील सादर करुंक नाशिल्लो अहवाल जिल्हो वेंचणूक अधिकाऱ्यांनी वेंचणूक आयोगाक धाडलो. हो अहवाल मेळ्ळे उपरांत नेमा प्रमाण 3 वर्सां मेरेन वेंचणूक लडोपाचेर बंदी घालपी आदेश जारी जाला. सुनील सुरेश फुलारी हांकां आतां फुडली 3 वर्सां विधानसभा तशेंच लोकसभा वेंचणूक लडोवपाक मेळची ना. सुनील सुरेश फुलारी हांकां वेंचणूक लडोवपा खातीर वेंचणूक आयोगान अपात्र थारायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
