खरो दोतोर

भांगरभूंय | प्रतिनिधी

स्थेतस्कोप लावन कानात हांव सदांच मिरयता, आंगार घालून धवो कोट दुयेसांक हांव धांवडायतां, फुस्स फुस्स करून प्रेशर चेक आरोग्याची कोडी सोडयतां, म्हणटात म्हाका दोतोर, हांव पिडेस्ताची जीण सुदरायतां, कुच्च करून मारून इनेसांव वखद तुका पिवयतां, दिवन तुका टॉनिक बिनिक भलायकी तुजी सुदरायतां, नव्या जिवाक हाडुंक भुंयेर देवाक हांव होरायता, केन्ना येतात कात्री हातात, टाक्यान काती धागे शिवयतां, जिवीत राखणेचो घेतला सोपूत, कांचवेल्यांक आदार हांव पावयता, जावंक एक खरो दोतोर साणयेवरी जीण म्हजी झरयतां.
दोतोर जावप हें खूप जाणाचें सपन आसता, पूण तें खरें जाताच अशे ना. तें तशे सोपे न्ही. ताका खूप अभ्यास करचो पडटा. खूब पयसोय हें शिक्षण मेळोवपाक मोडचो पडटा. तशेच जाका खर चिकाटी आसा तोच जावक शकता खरो दोतोर. जाका दुसऱ्यांची सेवा करपाची खरीच आवड आसता तोच खरो दोतोर. जो रगत पळोवन भिना. जो कसल्याच दुयेसांक धीट मनान तोंड दिवक शकता तोच आसता एक खरो दोतोर. दोतोरकेक ‘noble profession’ अशें म्हणटात. खरेंच हें एक मानाचें काम. पिडेस्ताक आदार करपी मनीस म्हळ्यार दोतोर. जसो मुदयेर थीक बसोवपी आसता शेट तसो त्या दुयेंसाक ज्यूस्त तें वखद दिवपी आसता दोतोर.
मनशाचे दोतोरा कडले नातें जन्मोजन्माचें आसता. एक भुरगो जल्माक येवपाचो तेन्नाच्यान ते जाणटेपण मेरेन आमकां दोतोराची गरज लागताच. जो दुयेंसाचें बरें निदान करता तोच बरो दोतोर अशे लोक ताका वळखतात. ज्या दोतोराचो हातगुण बरो आसता ताकाच सदांच चड गर्दी पडिल्ली आसता. मागीर अपॉयंटमेंट काडून रांकेन रावून पसून त्या दोतोराक मेळपाचें पासियेंस काडपाक लोक तयार आसतात, पूण तोच दोतोर जाय.
जमनीर देव नासता तेन्ना आसता फकत दोतोर, हें फट न्हय. त्या वेळार जीव वाटावप ही दोतोराची पयली जापसालदारकी. आपल्या दुयेसांचें निदान बरें जातलें हे आशेन जण एकलो दोतोरा कडेन वताच. चड बरो ना तेन्ना पीडिताक थाकाय दिवप, आपुण आसतना भिवं नाका सगळें सारकें जातलें ही दोतोरालीं उतरां आयकुनूच त्या वेळार बरो नाशिल्लो मनीस अर्दो बरो जाता. आपल्या जीवाचें रक्षण दोतोरा कडच्यान जातलेंच हो दिलासो पिडेस्ताक आपशीच मेळटा.
कोरोनाच्या म्हामारींत तर दोतोरांनी रगत आटोवन लोकांक बरे केले. तांकां जीव तोडून 2४ वरां काम करचें पडलें. म्हामारीचो तो काळ सोंपो नासलो. दोतोरांक धड जेवंक खावंक फुरसत नाशिल्ली. दिसपट्टी मरणां पळोवन दोतोर पसून थरथरून गेल्ले. दोतोरांनी आपली सगळी शक्त पणाक लायली, आपलें घर दार विसरून फकत आपलें काम करत रावले. जसो सिमेर आशिल्लो जवान देशाचे राखणे खातीर धडपडत आसता तशेच म्हामारीच्या काळात दोतोर झटत रावले. पडले, हरले, कोरोनाक विटले पूण स्वतः तांणी जगप सोडलेंना ना, कोणालो जीव जगोवप सोडलेंना. आपलें कार्य करत रावले आनी लोकांक वाचयत रावले. एक दोतोर कसो आसता हें लोकांक त्या वेळार दोतोरांनी दाखोवन दिलें.
कालूच दोतोर दीस मनयलो. ह्या दोतोर दिसाच्या निमतान सगळ्या दोतोरांक म्हजे कडल्यान खूब खूब परबीं. तुमचें काम खरेंच खूब तोखणाय करपा सारकें.
तुमकां देवान दर पिडेस्ताक घटमूट करपाक बरी ताकद दिवं.

शिल्पा लाड
8411007204