भांगरभूंय | प्रतिनिधी
विनायक होगाडे : युवा कोंकणी साहित्य संमेलनाचें उक्तावण
भांगरभूंय । प्रतिनिधी
मडगांव : सध्या भुरगीं मोबायल फोना कडेन वळत आसात. तें उणे करपाची सामकी गरज आसा. ज्ञानेश्वर, तुकाराम, कबीर आनी त्या काळांतले संत हे पयले साहित्यीक आशिल्ले. लेखन, प्रवचन, किर्तन ह्या माध्यमांचो उपेग करून ते भौसाक जागृत करताले. लेखक तोच आसता जो अस्वस्थ आसता. आपले भोंवतणची परिस्थिती पळोवन अस्वस्थताय जाणवपीच बरें बरोवंक शकतात. मनशांक एकामेकां कडेन जोडटा तें खरें साहित्य. मागीर तें खंयचेय शैलींतलें आसूं. जें एकमेकांक तोडटा तें साहित्य आसुंकूच शकना, अशें मत पत्रकार आनी लेखक विनायक होगाडे हांणी उक्तायलें.
गोवा कोंकणी अकादेमी, पणजी आनी रोजरी वाणिज्य आनी कला महाविद्यालय, नावेली हांच्या जोड पालवान नावेलीच्या रोजरी पॅरिश हॉलांत 24 वें युवा कोंकणी साहित्य संमेलनाचें आयोजन केलां. शेनवारा ह्या संमेलनाचें उक्तावण जालें. ह्या वेळार मुखेल सोयरे म्हूण विनायक होगाडे उलयताले. संमेलनाध्यक्ष म्हूण शिक्षक आनी कथाकार जोफा गोन्साल्वीस हजर आशिल्ली. रोजरी महाविद्यालयाचे प्राचार्य हॅलीक बार्रेटो, गोवा कोंकणी अकादेमीचे प्रभारी अध्यक्ष वसंत सावंत माचयेर हाजीर आशिल्ले.
भक्त म्हणल्यार वेगळो विचार करपाची तांक आशिल्लो मनीस. त्या काळार समाजाच्या वायटपणाचेर जे लोक उलयताले ते समाजीक बदला खातीर वावुरताले. लेखक जावचे पयलीं बरो वाचक जावंक जाय. बरोवपाची सुरवात वाचनांतल्यान जाता. खंयच्याय प्रकारांत अभिव्यक्ती जावचें खातीर बरोवप हेंच पयलें पावल. सातत्यान बरयल्या उपरांत तुमकांय कळपाक लागता, तुमीय बरोवंक शकतात आनी तेन्नाच तुमचो लेखक म्हणून निर्मितीचो प्रवास सुरू जाता. घडपी घडणुकांचेर नदर दवरून ताचे कडेन पळोवपाची नवी नदर आपणावपाची गरज आसा. हो वायट विचार पातळावपाचो काळ आशिल्ल्यान बऱ्यां विचारां खातीर बऱ्या पुस्तकांचो आदार घवप गरजेचें. तशेंच लेखकान सृजनशील आसूंक जाय, अशें होगाडे हांणी सांगलें.
टिका सकात्मक नदरेन घेवची
कोंकणीच्या वेगवेगळ्या प्रदेशांतल्या लेखकांक एकठांय हाडून तरणाट्या लेखकांक एक माची मेळोवन दिवप हो ह्या संमेलनाचो हेत आसा. हेर भाशांनी बरयल्लें वा दुसरे लिपींतलें लेखन देवनागरी कोंकणींत येवपाची गरज आसा. एक भाशा एक लिपी जावपा खातीर हेर लिपींतलें बरोवप देवनागरींत रुपांतरीत करपाची गरज आसा. टिका सकारात्मक नदरेन घेवन नवी गजाल निर्माण करची. साहित्या वरवीं समाजाक नवी दिशा, विचार दिवपाचो यत्न जावंक जाय. मानवी मुल्यां तिगोवन दवरतना समाजांतलीं वायटपणां मुखार हाडपाची गरज आसा, पूण वाद वाडचे न्हय हाचीय जतनाय घेवपाची गरज आसा. सामान्य लोकांचे प्रस्न सामान्य लोकांचे भाशेंत मांडपाची गरज आसा, अशें मत संमेलनाध्यक्ष जोफा गोन्साल्वीस हांणी उक्तायलें.
ह्या संमेलनांत युवा साहित्यीक पुरस्कार दिवन जयेश अर्जुन राऊत हांचो भोवमान केलो. ब्रिजेश शेट देसाय हांच्या ‘पथरंग’ ह्या पथनाट्याच्या पुस्तकाचें लोकार्पण मानेस्तांच्या हस्तुकीं जालें. हाचे भायर युवांकुर आनी साहित्य संमेलनाची म्हायती पुस्तिकेचेंय लोकार्पण जालें.
जोफा गोन्साल्वीस हांणी सांगलें, कोंकणी साहित्यिकां कडल्यान बरें आनी सृजनशील साहित्य तयार करपा खातीर युवा संमेलन घडोवन हाडटात. ह्या युवा संमेलनांतल्यान आपूण घडलां. वेगवेगळ्या प्रदेशांतल्या कोंकणी लेखकांक एकठांय हाडप, गांवांतल्या लेखकांक उर्बा दिवप आनी तरणाट्या लेखकांक नवे मार्ग मेळोवन दिवप हो ह्या संमेलनाचो हेत आसा. युवा संमेलनांत लोकांचो वांटो वाडोवपाचे यत्न सुरू आसा. तरणाट्या लेखकांचें बरप नेमान उजवाडाक येवचें हे खातीर यत्न करपाची गरज आसा. कसल्याय प्रकारचें साहित्य आसलें तरी तें वेंचून काडून तातूंत प्रामाणीकपणान बरोवप गरजेचें, अशेंय तांणी सांगलें. वसंत सावंत हांणी सांगलें, संमेलनाच्या रुप्यां महोत्सवा कडेन आमी मुखार सरतना तरणाटे कोंकणी खातीर वावुरतात तें पळोवन बरें दिसता. कोंकणी वावरांत तरणाट्यांक मुखार हाडपा खातीर केल्ल्या वावराक फळ मेळ्ळां अशें दिसता, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
