भांगरभूंय | प्रतिनिधी
चिंतन – 30
कळावें तयासि कळे अंतरींचें ।
कारण तें साचें साच अंगीं ॥
तुकाराम महाराजान सांगिल्लें हें वचन खूब सोंपें आसा – आमी मनांत जें खरें अणभवतात, तें नजरेंत, वागण्यांत आनी सभावांत झळकून वता.
एके शाळेंत शिक्षकान भुरग्यांक विचारलें – ‘तुमचो गृहपाठ केला?’ सगल्यांनी हय म्हणलें. मात एके चलयेन मान सकयल घाली. शिक्षकान ताका विचारलें तर तें रडपाक लागलें. गृहपाठ ना करपा फाटलें कारणूय ताणें सांगूंक नाशिल्लें, पूण तिच्या वागपांतल्यान शिक्षकांक रोखडेंच कळ्ळें की तें फट उलयनासलें, तर ताचे कडेन खरेच कितें तरी कारण आसा. मागीर कळ्ळें- घरांत आई दुयेंत आशिल्ल्यान ताका सगलीं कामां करचीं पडिल्लें. ताचो शांतपणा आनी दोळ्यांतलें खरें दुख्ख हीच तिची जाप आशिल्ली.
एका ऑफिसांत बॉसान विचारलें – “रिपोर्ट तयार केला मरे?”
कर्मचाऱ्यान म्हणलें – “हय सर, जाला!”
पूण उलयताना ताच्या कपलाक घाम, हातांत कागद नाशिल्लो आनी नदरेंत गोंदळ दिसतालो. बॉसान हांसत म्हणलें– “तुजें तोंड रिपोर्टा परस चड अपडेट दिता.”
तुकोबा हेंच म्हणटात – सत्य भायर सरताच.
यशोदा कृष्णाक विचारता, “कृष्णा, खरें सांग, तुवें चोरी केली, चोरून लोणी खाल्लें?” कृष्ण म्हणटा, “ना आई! हांवें ना लोणी खावंक.” यशोदा कृष्णाक लागीं घेता आनी ताची पापी घेता. नामदेवराय वर्णन करतात
चुंबन घेता येतो परिमळु l
नवनीताचा गे सये ll
कृष्णाची चोरी अशी उक्ती जाता.
एका कॉलेजींत एक विद्यार्थी परिक्षेंत काॅपी करतना धरलो. ताणें रोखडेंच कबुल केलें – “हय सर, हांवें चूक केली. पूण हांव परत केन्नाच करचो ना.” ताची कबुली इतली प्रामाणीक आशिल्ली की शिक्षकांनी ताका दुसरी संद दिली. शिक्षकान म्हणलें – “तुमी फट उलयिल्लो जाल्यार तुका ख्यास्त मेळपाची. पूण तुज्या प्रामाणीकपणाक लागून तुका माफी मेळ्ळी.”
आमी कितलेंय फट रंगोवपाचो यत्न केलो तरी आमच्या काळजांतल्यो खरो भाव आमच्या मुखामळाचेर आनी वागण्यांत दिसता. फट टिकना, फकत खरी भावनाच मनशाक व्हड करता हाचो उगडास तुकोबा करता.
देखून दिसपट्टे जिणेंत एक सादो नेम – प्रामाणीक रावात, खरे रावात. लोक तुमचीं उतरां फुडें विसरतले, पूण तुमचीं भावना सदांच लक्षांत उरतली.
– ह भ प देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
