खरेंच, वशिल्या विणें नोकऱ्यो?

भांगरभूंय | प्रतिनिधी

सरकारान हाचे मुखार फक्त गुणवत्तेचेर नोकरी दितले, वशिलीबाजी कायमची बंद, अशें म्हणलां खरें. पूण, हें शिवधनुश्य उखलप दिसता तितलें सोंपें ना.

सरकारी नोकरेचे बाबतींत ‘कमी काम आनी चड दाम (पयसो)’ अशें सगलेच म्हणटात. अर्थांत कांय जाणांचे बाबतींत हें खरें थारलां. मात, सगलेच सरकारी कर्मचारी तशे वागनात. ते दिसपट्टो घाम गळयतात, मन लावन फटाफट कामां करतात, म्हूण सरकारी यंत्रणा चलता. नाजाल्यार सगलें ठप्प जावपाचें. रोजगार मेळाव्यांत खुद्द मुख्यमंत्री डाॅक्टर प्रमोद सावंत हांणी काल म्हत्वाची घोशणा केल्या. ती म्हणल्यार आतां नोकरे खातीर मंत्र्यांच्या दारांत रांको लावपाची गरज पडचीना. फक्त आनी फक्त गुणवत्तेच्या बळग्याक सरकारी नोकऱ्यो मेळटल्यो. फुडाऱ्याचो वशिलो आतां काळाभायरो जालो. 100 टक्के नोकऱ्यो कर्मचारी भरती आयोगा मार्फत. एक वर्साचो कामाचो अणभव आसा, तांकांच सरकारी नोकरे खातीर अर्ज करपाक मेळटले, अशेंय तांणी सांगलें. दोतोराची ही घोशणा पोटफुग्या खाणा सारकी जावं शकता. सगल्या लोकप्रतिनिधींनीक ती सध्या आवडल्या, मात फुडाराक तांच्या पोटांत गुडगुडपाक शकता! कारण 1980 साला सावन संबंदीत खात्याच्या मंत्र्या सामकार नोकरी मेळोवपाक ‘घालीन लोटांगण, वंदीन चरण…’ गावचेंच पडटा, अशें जाणकार सांगतात. बांदकाम खात्यांतल्या नोकऱ्यां खातीर तर हालींच दोन मंत्र्यां मदीं वाद जाल्लो. कांय जाणांचे भाव, धूव सुटकेशी स्विकारले उपरांतूच कंत्राटां दितात, अशेय आरोप जाल्यात. थोडे नोकरी दिवपाक गोडशें मागताले… प्रत्येकाची वेगवेगळी तरा. अंदमान- निकोबारांत नोकरी जाय जाल्यार मुख्य सचिव दया, माया दाखयनासतना चलयांक बंगल्याचेर आपयतालो, अश्यो खबरो छापून आयल्यात. आमच्या गोंयांतूय अशाच कारणाक लागून 25 वर्सां पयलीं एका मंत्र्याक राजिनामो दिवचो पडिल्लो. सांगपाचो उद्देश, कसल्याय सरकारी काम, नोकरी, कंत्राट, बडटी, बदली………. खातीर वशिलो हो लावचोच पडटा, हें उघड सत्य.
फाल्यांच्यान गुणवत्ता, कुशळटाय विचारांत घेवनूच नोकरी दितले जाल्यार ताका येवकार दिवचोच पडटलो. अशें जाल्यार वर्सभरा उपरांत गोंयचे सरकारी यंत्रणेची गुणवत्ता सुदारतली. उदरगतीचे बाबतींत गोंय तरतरतलें. रोजगार मेळाव्यांत जाल्ली ही घोशणा आमच्या उरिल्ल्या 39 प्रतिनिधींनी सकारात्मक रितीन घेवंक जाय. नोकरे खातीर दारांत आयिल्ल्या उमेदवारांक ‘गुण दाखय, नोकरी मेळय’, अशें तोंडारूच सांगपाक जाय. तशें जाल्यारूच फक्त गुणांचेर आदारून लोकांक रोजगार मेळटलो आनी कोणाचेरुच अन्याय जावचो ना. सगलें कितें पारदर्शक म्हणटकच वशिलेबाजीचे आरोपूय जावचे नात. नेमणुकीचे नेम फाटलीं 30 वर्सां तशेच आसात. तातूंत सुदारणा करपाचो सरकाराचो विचार आसा, अशेंय दोतोरान सांगलें. नेम बदलतना सरकारी नोकऱ्यो दरेका मतदारसंघांत वांटून वतल्यो (गुणवत्तेचेर आदारून), असो एक खर नेम सरकारान करचो. समजा, एका खात्याच्यो 420 नोकऱ्यो जाहीर जाल्यात, जाल्यार 40 सूय मतदारसंघांत दरेकी 10- 10 नोकऱ्यो वचपाक जाय. ते खातें सांबाळपी मंत्र्याच्या मतदारसंघाक 120 आनी उरिल्ल्या 39 मतदारसंघांक 300 नोकऱ्यो, अशी वांटणी अन्यायकारक. मंत्री हो सगल्या राज्याचो, हें कोणे विसरचें न्हय. सरकारान फाटल्या 10 वर्सांत दिल्ल्यो नोकऱ्यो करपी तरणाटे खंयच्या मतदारसंघांतले, ताचो त्या- त्या खात्या प्रमाण नियाळ घेतल्यार कितें चुकीचें जाल्लें आसल्यार कळटलें.
5500 नोकऱ्यांक 15 हजारां वयर उमेदवार येतात, ही राज्या खातीर लजेची काय अभिमानाची गजाल हेंय पळोवचें पडटलें. बेकारीचो आंकडो व्हडलो दिसलो तरी भोवतेक तरणाटे ल्हान- व्हड नोकरी करतात. मात बरो पगार, कामाचें समाधान, लागच्या लागीं काम… अशा कांय कारणांक लागून नोकरी करपीय सदांच दुसरे नोकरेच्या सोदांत आसतात. तातूंत तांची चूक म्हणपाक मेळची ना. सरकारी नोकरी दितना संबंदीत कर्मचारी कामाक बरो आसल्यार ताका वर्सा भितर नोकरेंत कायम करूंक जाय. ताणेंय कायम जाय मेरेन ज्या नेटान काम केलें, त्याच नेटान काम करूंक जाय. मात तशें जायना, ही खेदाची गजाल. गोंय हें देशांतलें सगल्यांक म्हारग राज्य. हांगाचें राहणीमानूय उंचेलें. तेन्ना नोकरदाराक उणोच 25 ते 30 हजार तरी पगार जाय. म्हणटकच नोकऱ्यांची घोशणा जाली काय गर्दी ही जातली.
सरकारान हाचे मुखार फक्त गुणवत्तेचेर नोकरी दितले, वशिलीबाजी कायमची बंद, अशें म्हणलां खरें. पूण, हें शिवधनुश्य उखलप दिसता तितलें सोंपें ना. कारण, बऱ्याच लोकप्रतिनिधींक आनी तांच्या वावुरप्यांक हो निर्णय आवडचो ना. मतदारांच्या कल्याणा खातीर ह्या पक्षांतल्यान त्या पक्षांत उडकी घेतिल्ल्यांचो तर सामको घुस्मटमार जाला आसतलो.